New Delhi, Jymmang:
Shiphew sngi hadien ka jingthombor jong ki lehnoh ha Pahalgam kaba la pynïap briew, u Myntri Rangbah ka jylla Jammu & Kashmir, u Omar Abdullah, u la ïakynduh ïa u Myntri Rangbahduh ka ri, u Narendra Modi, ha ka sngi Saitjaiñ ha New Delhi.
Kane ka dei ka jingïakynduh ha ka sien kaba nyngkong eh hapdeng u Myntri Rangbah ka J&K bad u Myntri Rangbahduh hadien ka jingjia jong ka jingthombor ki lehnoh, kaba la shim ïa ka jingim jong ki 27 ngut ki briew na kylleng ka ri India ha Pahalgam ha ka 22 tarik, Ïaïong. Ha katei ka jingïalang kaba 35 minit, u Abdullah u la ïakren ïa ki katto katne ki mat, kynthup ïa ka jinglong jingman kaba la jia ha ka Valley hadien ka jingshah thombor bad ka jinghiar kaba paw ha ka jingdon ki nongjngohkai pyrthei ha kylleng ka thaiñ.
Katkum ki tyllong khubor, u Abdullah u la poi ha ïing sah jong u Myntri Rangbahduh ha ka por mynstep katkum ka por ba la buh bad u la pyntip sha u Modi halor ka jinglong jingman.
Haba shim ïa ka khubor ha ka rynsan ‘X’ (Twitter), ka National Conference – ka seng jong u Abdullah – ka la ïasam da kaba ong ba, “U Myntri Rangbah ka J&K u Omar Abdullah u la ïakynduh ïa u Myntri Rangbahduh ka ri u Narendra Modi ha New Delhi bad ïakren ïa ki mat bapher bapher, kynthup ïa ka jingthombor jong ki lehnoh ha Pahalgam ha ka taïew ba la lah.”
Ka jingïakynduh jong u Myntri Rangbah jong ka J&K bad u Narendra Modi ka la jia hapdeng ka jingkiew ka jingïakynad hapdeng ka India bad ka Pakistan hadien kane ka jingshah thombor, bad ka jingjur ka jingkhot ban leh ïa ki kam pynshitom kylla da ki shipai kiba khlaiñ pyrshah ïa ki ktem lehnoh bad kiwei kiwei ki bynta kiba kyntiew ïa ki kam lehnoh na ka khyndew ka shyiap jong ka Pakistan.
Ki tyllong khubor ki la ïathuh ba u Myntri Rangbah jong ka J&K u la pynpaw ruh ïa ka jingkyrshan jong ka sorkar jong u sha ka sorkar pdeng ha ka jingïakhun pyrshah ïa ki kam lehnoh ha ka jingïalang.
Dang shen, u Abdullah u la pynpaw ba ka jingbitar paidbah hadien katei ka jingshah thombor ka la phah ïa ka khubor kaba khlaiñ bha sha ki lehnoh bad ka la ai dak ïa ka jingkut jong ki kam lehnoh ha J&K. Haba kren ha ka dorbar kyrpang jong ka J&K Assembly hadien katei ka jingshah thombor, u la ong ba ka Ïingdorbar ka sngew ïa ka jingsngewsih jong ki bahaïing hasem jong kiba la khlad noh kham bun ban ïa kiwei pat, bad u la pynrem jur ïa ki jingshah pynïap ha ka dorbar kaba shisngi.
Ki kyntien jong u ki la ktah jur haba u la ong, “Ngam shym la don ki kyntien ban panmap na kine ki longïing, watla ka jingshngaiñ jong ka Jammu & Kashmir kam dei ka kamram jong ka sorkar ba la jied.” U la pynpaw ruh ia ka jingsngewsih namar ba um shym la lah ban pynthikna ïa ka jingwanphai biang jong ki nongjngohkai pyrthei da kaba suk, da kaba kam ïa ka bynta jong u kum u Myntri ka tnad ki kam jngohkai pyrthei. Ha kajuh ka por, ki tyllong khubor ki la pynpaw ba ka jingïakynduh jong u Abdullah bad u Myntri Rangbahduh ka dei ruh ka jingpynpaw ïa ka jingïatylli bad kano kano ka sienjam ba la leh pyrshah ïa ki kam lehnoh bad ki bynta kiba kyrshan ïa ka.
Kaba kham pawnam ka long ba hadien ka jingïakynduh jong u Abdullah bad u Modi, u heh shipai duriaw u la ïakynduh ruh ïa u Myntri Rangbahduh, la ïathuh ba un pyntip lyngkot ïa u halor ka jingpynkhreh bathymmai pyrshah ïa ki kam lehnoh. La ngeit ba ka India ka lah ban ai shen ïa ka jubab kaba khlaiñ ïa kaei kaba la ïohi kum ka ‘karkhana lehnoh’ jong ka Pakistan, hadien ki jingpyrshang jong ki nongïalam ban pynkyrpang ïa ka hadien ka jingshah thombor.
U President ka ri India, u Modi, bad ki Myntri Rangbah, ki la pynsangeh ïa ki katto katne ki jingleit jngoh ïa ki shabar ri, namar ka jingïakynad kaba don hapdeng kitei ki ar tylli ki ri kiba don ïa ki tiar Nuclear. Ki tyllong khubor ki ïathuh ba la ïathuh ba ka jaka her liengsuiñ halor ka Pakistan ka la khang haduh ka 23 tarik u Jymmang. “Kumta uwei u lah ban khmih lynti ïa ka jingleh kaba khlaiñ shwa kata ka por ba la buh ban khang ïa ka lynti suiñ,” la kynthoh kawei ka tyllong khubor kaba la buhrieh kyrteng.
