New Delhi, Jymmang:
U Air Chief Marshal AP Singh ha ka Sngi U Blei u la ïakynduh ïa u Narendra Modi, Myntri Rangbahduh jong ka ri, hapdeng ka jingïakynad kaba nangjur hapdeng ka India bad ka Pakistan, halor ka jingthombor jong ki lehnoh ha Pahalgam, kaba la pynïap ïa 26 ngut ki briew, ha ka 22 tarik, Ïaïong, ong ki tyllong khubor.
Kane ka jingïakren bad une u heh shipai suiñ ka la jia tang hapoh 24 kynta hadien ka jingïakynduh ba kyrpang hapdeng u Myntri Rangbahduh bad u Admiral Dinesh K Tripathi, u heh shipai duriaw.
U Modi u la ïakynduh ruh ïa u heh shipai General Upendra Dwivedi ha ka taïew ba la lah.
Katba ym shym la pynmih ïa ka jingpule kaba thikna jong katei ka jingïalang sha ki lad pathai khubor, la ïohi ba ka dei kum shi bynta jong ka jingïakren kaba dang ïaid shakhmat halor ka jingpynbeit ïa ka jingshah thombor ha ka 22 tarik, Ïaïong, ha kaba ki riewkieng atiar ki la siat ïa ka kynhun ki nongjngohkai pyrthei ha Pahalgam.
Baroh kiba la shah pynïap ki dei ki ‘riew paidbah, kiba bun ki dei ki nongjngohkai pyrthei na ki jylla bapher bapher ha kylleng ka ri India, kiba wan jngoh ïa katei ka thaiñ kaba itynnad ha ka thaiñ Shathie jong ka Kashmir.
Kane ka jinghiar thma ka dei kawei na ki jinghiar thma kaba shyrkhei tam ïa ki ‘riew paidbah ha Kashmir ha kine ki snem ba la dep bad ka la pynmih ïa ki jingkhot ban pynshitom tyngeh pyrshah ïa ka Pakistan, kaba ka India ka kynnoh ba ka ai jingkyrshan ïa ki kynhun lehnoh ban pynlong ïa ki jinghiar thma sha shiliang pud.
U Modi, ha ka jingïalang ba ha khlieh duh, kaba la long ha kaba sdang jong kane ka taïew, u la ai jingbthah shai ïa ki nongïalam jong ka tnat ïada ri, ba ki shipai India, ki don ïa ka “jinglaitluid kaba pura ha ka jingtreikam” ban rai ïa ka jinglong, ki thong, bad ka por jong ka jingïakhun jong ka ri, halor ka jingshah thombor.
Ha katei ka jingïalang kaba kham ha shwa ki long u Myntri ka tnad ïada ri u Rajnath Singh, u nong-ai jingmut ka tnat ïada ri u Ajit Doval, u heh shipai ka tnad kam pohïing u General Anil Chauhan, bad ki heh jong ki shipai, ki shipai duriaw, bad ki shipai suiñ.
Ar sngi hadien ka jingpynïap briew ha Pahalgam, ka jingkdew jong u Modi ban rah ïa ka jingïaleh sha “ki kut jong ka pyrthei” bad ban pynshitom ïa ki nongleh kam sniew “palat ïa ka jingmut jingpyrkhat jong ki” la ïohi paidbah kum ka khubor kaba beit sha ka Pakistan.
Ha ka histori, ka India ka la jubab ïa ki jingpynkhih jong ki lehnoh da ka bor.
Ha u snem 2016, ka India, ka la pynlong ïa ki jinghiar thma Surgical Strike, ha ki jaka siat bom jong ki lehnoh, ha shilynter u Line of Control, hadien ka jingshah thombor jong ki shipai ha Uri jong ka J&K, bad ka jinghiar thma liengsuiñ jong ka Balakot ha u snem 2019, hadien ka jingbthei bom ha Pulwama.
Ki shipai suiñ ki la don ka bynta kaba kongsan ha ka jingkhynra Balakot, da kaba pyndonkam ïa ki liengsuiñ ïapom Mirage-2000 ban pynlong ïa ki jinghiar thma ha kaei kaba ka sorkar ka la batai kum ka jaka ai jinghikai ïa ki lehnoh ba kongsan.
Hadien ka jingshah thombor ha Pahalgam, ka India ka la dep ban shim ïa ki sienjam kiba ïadei bad ka jingïadei bad ka buit treikam kaba thmu ban pynjur ïa ka jingpynbor ïa ka Islamabad. Kawei na kum kine ki jingleh ka long ka rai ban pynsangeh noh ïa ki katto katne ki kyndon jong ka Indus Waters Treaty, ka jingïateh kaba la slem bha hapdeng ki arliang mamla kaba synshar ïa ka jingpyndonkam ïa ki wah kiba tuid na India sha Pakistan.
Wat hapdeng ka jingpynbor jong ki paidbah bad ka sur kaba skhem kaba la shimda u Myntri Rangbahduh bad ki heh ophisar, haduh mynta ym pat don kano kano ka ktien kaba thikna halor ka jinglong ne ka por jong kano kano ka jingleh pynrem.
