Bengaluru, Jymmang:
Ban pynpaw ïa ka jingïatylli bad ki shipai, kiba la ïakhun tyngeh ïa ki lehnoh bad ki nongkyrshan jong ki ha Pakistan, ka BJP ka pynlong ïa ka Tiranga Yatra kaba khlem saiñ pyrthei ha Bengaluru bad ha kiwei kiwei ki bynta jong ka Karnataka.
Kane ka Yatra kan long ha Bengaluru ha ka 15 tarik, Jymmang bad ha ki distrik bad ki thaiñ naduh ka 16 haduh ka 23 tarik u Jymmang. U nongïalam ka liang pyrshah ka Assembly u R Ashoka u la ïathuh ha ki lad pathai khubor ba ha Bengaluru, ha ka por 11 baje hynnin mynstep, ba ka Yatra kan ïaid na Shiruru Park sha 18th Cross ha surok Sampige ha Malleswaram. Yn pynlong ha ki distrik Centre ha ka 16 bad 17 tarik u Jymmang, bad ha ki Taluk Centre naduh ka 18 haduh 23 tarik u Jymmang.
Ka Yatra kan ym don ki dak ki shin jong ka seng, hynrei kan don tang ka lama ri, u la ong bad kyntu ïa ki briew ba kin ïashim bynta da kaba bun.
U president ka BJP ha ka jylla u B.Y.Vijayendra u la ong ha Shivamogga ba ki shipai kiba la shongthait bad ki bahaïing jong ki, ki nongrep, ki doktor bad ki riewpaidbah ki dei ban ïashim bynta ha ka Yatra.
U la ong ba ha Mangaluru, Belagavi bad ha Ballari, ïa ka Yatra yn shim noh ha ka 16 tarik u Jymmang, katba ïa ki tarik ban pynlong ïa ka yatra ha baroh kiwei ki jaka treikam jong ki district yn sa pynbna hadien.
Halor ka jingkynthoh jong ki nongïalam ka Congress, kynthup ïa u Myntri ka tnad RDPR u Priyank Kharge, ba u Myntri Rangbahduh u Narendra Modi u la kohnguh ïa ki jingbthah jong u President ka US Donald Trump u Vijayendra u la ong, “Ka sorkar pdeng bad u Modi kin jubab ïa ka jingkren jong u Trump. U Myntri Rangbahduh u la dep pynshai da kaba ong ba man ki kam pyntriem jong ki lehnoh yn ñiew kum ka jinghiar thma. Kane ka jingsangeh ïasiat kam dei kaba neh.”
Halor ki nongïalam ka Congress kiba kynnoh ïa u Modi ba u la shim ïa ka burom na ka bynta ka Operation Sindoor, u Vijayendra u la ong, “U Modi u la dep ïaroh ïa ka jingpyrshang jong ki shipai ïada ri ha ka Operation Sindoor. Ka mon thikna kan leit sha ki shipai ïada ri.” U Ashoka u la ong ba palat 100 ngut ki lehnoh ki la shah pynïap, ki jaka ai jinghikai ki la shah pynpra, bad la pynlong ïa ka Pakistan haduh katta katta ban kyrpad ban sangeh noh ïa ka thma. Ka Congress ka dei ban kyrshan ïa ki shipai ha ka jaka ban leh politik, u la bynrap.
U Ashoka u la ong ba kim buh jingkylli ïa ki jingjia ba la dep kum ka jingaiti ïa ka PoK lane ka jingkynthoh hadien ki jingshah thombor ha Mumbai. Ym donkam ban ïanujor ïa kane bad ka jingleh ba la leh ha ka por ba ka Indira Gandhi ka dang long Myntri Rangbahduh, u la ong bad bynrap ba lada ki kdew ïa ka jingthaw ïa ka Bangladesh, ka jingkylli ka mih balei la ai noh ïa ka PoK.
Hynrei kim pat ïakren ïa kane mynta namar kam dei ka por ban ïakren kum kine, u la ong.
Utei u nongïalam ka BJP u la ong ba ka sorkar pdeng ka la dep ban pynshai ba kam shym la don kano kano ka jingïapynbeit na ka liang kaba lai ha ka jingsangeh thma, bad ka India kan ym pdiang ïa kum kane ka jingwan tuklar.
