Bengaluru, Jymmang:
U Myntri Rangbah ka jylla u Siddaramaiah u la kynthoh jur ïa ka sorkar pdeng da kaba kynnoh ba kam shym la pyllait ïa ka bhah kaba dang sahkut kaba T.4,195 klur na ka bynta ki skhim ba la kyrshan da ka sorkar pdeng ha u snem mang tyngka 2024-25.
U la kyntu ïa ki MP na Karnataka ba kin ïoh ïa ki Grant na ka sorkar pdeng, bad u la ong ba u la dep ban ïakynduh ïa u Myntri Rangbahduh ka ri u Narendra Modi bad ïa ka Myntri pla pisa jong ka sorkar pdeng ka Nirmala Sitharaman, bad u la ai ïa ka jingkyrpad ban pyllait noh ïa ki Grant kiba dang sahteng.
“Ha u snem 2024-25, ka jingai jingiarap na ka bynta ki projek ba la kyrshan da ka sorkar pdeng ka long T.46,859 klur, ha kaba ka jingïarap jong ka jylla ka long T.24,960 klur, bad ka jingïarap jong ka sorkar pdeng ka long T.22,758 klur. Ka Disha Committee ha ka kyrdan jong ka jylla ban bishar bniah ïa ka jingïaid shaphrang jong ki 67 tylli ki projek ba la kyrshan da ka sorkar pdeng.
Ka bhah jong ka sorkar pdeng bad ka jylla ha ki projek ba la kyrshan da ka sorkar pdeng ka long naduh ka bynta jong ka 50:50, 60:40 bad 70:30, u la ong.
U CM u la bthah ïa ki heh sorkar ban ioh ia ka jingkiew kaba 100 percent. Katba 83 percent na ki Grant la pynlut, ki heh sorkar ki la pynshong nongrim ha ki katto katne ki jingeh, kynthup ïa ka jingpynslem ban pyllait ïa ki Grant na ka sorkar pdeng. U la ong ïa ki heh sorkar ba kin pynlut 100 percent ïa ki Grant na ka bynta u snem 2025-26, bad kyrpad ïa ka sorkar pdeng ban pyllait ïa ki Grant ha ka por kaba biang.
Haba ki heh sorkar ki pynleit jingmut ba ka jylla kam pat ïoh ïa ka jingïarap jong ka MNREGA na ka Centre, u Siddaramaiah u la ong ba dei ban pynlong ïa ki jingïalang ka kynhun Disha man ka por ha ka kyrdan distrik, bad kyntu ïa ki MP ba kin shimkhia. U la hukum ban shim da ka aiñ bad ban ujor mukotduma pyrshah ïa ki ophisar kiba la leh beaiñ ha kaba pyntreikam ïa ka skhim MNREGA.
Ki heh sorkar ki la pyntip ba ka bhah kaba ar snem kaba T.10,000 klur ka dang sahteng na ka Centre na ka bynta ka National Rural Drinking Water Scheme, kaba la wanrah ïa shibun ki jingpynslem. Ka pisa kaba T.7,656 klur ka dang sahkut hapoh ka projek Jal Jeevan Mission na ka bynta u snem 2023-24, bad T.3,233 klur na ka bynta u snem 2024-25, ki la bynrap.
U MLA ka Shivajinagar uba dei ruh u dkhot ka Disha Committee u Rizwan Arshad u la rkhie beiñ ïa ki MP ka BJP ka jylla, da kaba kylli hato ka sorkar pdeng kam don pisa ban pynbiang ïa ka umbam umdih.
U Siddaramaiah u la thombor ïa ka sorkar pdeng namar ka jingbym lah ban pyllait ïa ka song jingïarap kaba T.5,360 klur kaba la pynbna ha ka mang tyngka jong ka sorkar pdeng na ka bynta ka Upper Bhadra Project na ka bynta u snem 2023-24. “Ym shym la pyllait wat tang kawei ruh ka pisa haduh mynta. Watla ka kynhun jong ka jylla ka la ïakynduh arsien ïa ka Myntri pla tyngka jong ka sorkar pdeng, hynrei kam shym la myntoi ei ei,” u la kynnoh.
Ka sorkar pdeng ka la ot ruh ïa ka bhah jong ka na ka bynta ki skhim ai jingïarap ha ka imlang-sahlang, khamtam eh ïa ki penshon. “Ka jingai jingïarap jong ka jylla na ka bynta ki skhim baibam jong ki longkmie kiba la ïap lok, baibam tymmen, bad baibam jong kiba duna dkhot met ka long T.5665.95 klur, katba ka jingai jingïarap jong ka sorkar pdeng ka long T.559.61 klur, hynrei kaba hadien ka la pyllait tang T.113.92 klur,” la kam u Myntri Rangbah. “Lada ym pyllait pisa ha ka por, kumno yn pynlong ïa ka roi ka par?”
