Vijayawada, Naitung:
Ha ka jingkhynra lang jong ka Elite Anti-Narcotics Group for Law Enforcement (EAGLE), Railway Protection Force (RPF), bad ki Pulit Rel Sorkar (GRP), la kem ïa uwei u briew (29 snem) bad la kurup ïa ki Chocolate Ganja bad u Ganja ha ka Sngi Palei.
U heh jong ka EAGLE, u Ake Ravi Krishna bad ka kynhun jong u, ki pulit jong ka Eluru, ka RPF, bad ka GRP ki la ïashim bynta ha ka jingjurip kynsan ïa ki rel kum shi bynta jong ka jingïaid lynti ban peit bniah ïa ki rel bad ban pynthikna ba ym don kino kino ki dawai pynbuaid.
La phiah ha ki kynhun bapher bapher, ki ophisar ki la kiew ha ka liengsuiñ Coromandel Express ha Eluru bad ki la jurip bniah ïa baroh ki bynta jong ki rel.
Haba u heh jong ka EAGLE u la jurip ïa ki jingkit jong ki nongleit nongwan ha ka S4 coach, u la lap ïa u Ganja ba la pynkylla dur pyllun bad la sop da ki jingtap Chocolate.
La kem ïa utei u briew bad la kurup ïa u Ganja. Hadien la wanrah ïa u sha ka jaka sangeh rel ha Vijayawada bad la aiti noh sha ki pulit ka GRP ka Vijayawada.
“Ryngkat bad uba shah kynnoh u Subhash Kumar Yadav, saw ngut kiwei pat ki dang leit sha Chennai, une uba shah kynnoh u ju trei ha kawei ka jaka dih sha bad u thied ïa ki Chocolate Ganja na kawei ka dukan ha shnong jong u na ka bynta ban bam ïalade”, la ong ki pulit ka GRP.
La mudui da ka mukotduma pyrshah ïa u bad la ïalam ïa u ha ka ïingbishar ha ka sngi Thohdieng.
Ha kawei pat ka liang, kum shi bynta jong ka Operation Vijay, ka EAGLE ka la pynlong ïa ka jingjurip kaba kyndit ha Eluru Railway Station ha ka sngi Palei jong ka taïew ba la lah.
U Ravi Krishna bad u SP ka Eluru u K Pratap Siva Kishore ki la ïalam ïa kane ka jingkhynra ban khanglad ïa ka jingshalan be-aiñ ïa ki Ganja bad ki jingdih pynbuaid lyngba ki rel.
U Ravi u la ong ba la ïoh kurup 21,736 kg u jingdih pynbuaid Cannabis ha kylleng ka AP haduh katei ka sngi.
U la kdew ba ïa ka jingrep kynbat la lah ban pynduh pyndam pura ha ka distrik ASR da kaba pyndonkam ïa ki Drone bad Satellite Technology. La pynjari ïa ka jingpeitngor ïa ki 359 ngut ki briew shimet ha kylleng ki 370 tylli ki shnong, katba 10,256 ngut ki nongrep ki la ïoh ïa ki symbai ban rep 22 tylli ki jingthung bapher bapher ha kylleng ki 4.6 lak hektar.
Wat hapdeng ki jingpyrshang, katto katne ki Ganja ki dang shah pynpoi tuh na Odisha lyngba ki rel.
Ha kajuh ka por, hapoh ka Joint Rail-Based Operation, ki pulit jong ka Araku Valley, ki kynhun jong ka GRP, RPF, bad Dog Squad ki la khynra ïa ki 13 tylli ki Coach rel ha Araku Station, ha kaba ki la kem ïa ki briew kiba la suba.
