Khliehriat, Naitung 10
Ka lympung ïalehkai 3rd Division League Stage ba la pynïaid da ka East Jaiñtia Hills District Football Association (EJHDFA) ka la nang jam shaphrang ha kaba ka Tongseng Youth SSC bad ka Pala SCSC ki la ïoh jingjop ha ka Sngi Palei ha madan Artificial Turf Diengshynrum, Khliehriat.
Ha ka jingïalehkai kaba nyngkong, ka Tongseng Youth ka la pynliem noh ïa ka Wahsarang SC da 2-0 kol. Kane ka la wan urlong lyngba ki kol na u Esai Lyndoh ha ka minit kaba 21 bad 40.
Ha ka jingïalehkai kaba bud hapdeng ka Musniang rim SC bad Moopala SC ki la ïasam mar shi point hadien ba ki la ïakhaid mar 2-2 kol. Ïa ki kol jong ka Musniang rim la thep da u Miki Siangshai ha ka minit kaba 42 & 57. Katba na ka Moopala SC la thep da u Trememon Bamon ha ka minit kaba 60 bad Phrangki Shadap (77).
Haba phai sha kawei pat ka jingïalehkai, ka Pala SCSC ka la jop da 1-0 kol ïa ka Nongsning YSC bad ïa kane ka kol la thep da u Hame Salahe ha ka minit kaba 30.
