Mumbai, Nailar:
Ka seng Shiv Sena ka la ai ïa ka jingkyrshan ba khlem buh kyndon ïa ka National Democratic Alliance (NDA) ba la ïalam da ka BJP na ka bynta ka ilekshon Vice President ban wan, la pynbna u heh ka seng bad u Symbud Myntri Rangbah jong ka Maharashtra, u Eknath Shinde.
Ha ka jingleit jngoh jong u sha New Delhi ha ka sngi Balang, u Eknath Shinde u la pynpaw ba ka Shiv Sena ka dang long kawei na ki seng ba la ïatreilang kaba la rim tam bad ba lah ban shaniah bha jong ka kynhun NDA. Ka kynhun ba la ïalam da ka BJP, ha kaba u dei u dkhot ba kongsan, na ka bynta ka ilekshon Vice president kaba la buh ban long ha ka 9 tarik u Nailur.
Ha ka jingleit jngoh jong u sha Delhi, u Eknath Shinde u la ïathuh ha ki nongthoh khubor hadien ba u la ïakynduh ïa u Myntri ka tnat ki kam pohïing u Amit Shah ba ka ‘Mahayuti’ kaba dei ka kynhun baïatreilang jong ka BJP, ka Shiv Sena bad ka NCP kin ïakhun lang ia ka ilekshon Local Body ha Maharashtra, la ïathuh ka tyllong khubor.
U la kyntait ruh ïa ki jingai jingmut ba ka jingleit khah khah jong u sha Delhi, ka ïadei bad ka “jingïapher jingmut” jong u bad u Myntri Rangbah ka Maharashtra, u Devendra Fadnavis, da kaba ong ba kim don kano kano ka jingteh ha ka jingïadei jong ki bad ba ki ïatreilang na ka bynta ka roi ka par jong ka jylla.
Ha ka kyrwoh kaba kham hadien, u Shinde u la pynbna ba ka seng jong u ka kyrshan khlem jingteh ïa ka National Democratic Alliance (NDA) ba ïalam da ka BJP na ka bynta ka jingthep vote Vice-president, kaba la long kaba donkam hadien ka jingiehnoh kam jong u Jagdeep Dhankhar ba mynta ha u bnai ba la lah.
Haba pynpaw ba u Myntri Rangbahduh ka ri u Narendra Modi u la kdew ha ka jingïalang jong ki MP ka NDA ha ka sngi Ba-ar ba u Shah u la kylla long u Myntri ka tnat ki kam pohïing uba la slem tam, u Shinde u la ong ba ma u bad ki MP jong ka seng jong u ki la ai khublei ïa u halor kane ka mawjam.
U la ai ka jingïaroh ïa u Shah na ka bynta ka jinglong nongïalam “bakut jingmut” jong u, da kaba ong ba u la pyndep ïa ka jingangnud jong u nongseng ka Shiv Sena, u Bal Thackeray, da kaba pynduh noh ïa ka Article 370, bad shim ïa ki lad ki lynti kiba tyngeh pyrshah ïa ki kam thombor bad ki kam pyntriem jong ki lehnoh.
Naduh ka jingpynroi ïa ka jingïatreilang haduh ka jingshngaiñ ka ri, ki jingnoh synñiang jong u Shah ki la long ka nuksa, la ong u Shinde.
“U Amit Shah u la kylla long u Myntri jong ka tnat ki kam pohïing uba la slem tam ha ka histori jong ka ri India, da kaba pyndep ïa ka samoi treikam kaba khlem sangeh kaba 2,258 sngi. Ngi la ïakynduh ïa u ban pynsngew ïa ka jingai khublei kaba sngewrit,” la ong u Shinde, ha ki lad phah khubor.
U Shah, u la ong, “Naduh ka jingpyndam noh ïa ka Article 370–ban pyndep ïa ka jingangnud na ka bynta ka Hindu Hriday Samrat Balasaheb Thackeray–haduh ban ïalam ïa ka ‘Operation Mahadev’ pyrshah ïa ki kam lehnoh bad ban tehlakam bha ïa ki kam pyntriem jong ki lehnoh. U Amit Shah u la pyni ïa ka jingïatreilang bad ka jingïatreilang kaba khlem artatien,” ka jingshngaiñ, ka jingnoh synñiang jong u ka la long ka nuksa.”
U Shinde u la pynpaw biang ïa ka jingïadei kaba la don lypa hapdeng ka Shiv Sena bad ka BJP.
“Ka jingïatreilang jong ngi ka la don lypa wat ban thaw ïa ka NDA. Kane ka jingïatreilang kaba neh mynta ka la pyndep ïa ka 25 snem,” la ïathuh ka tyllong khubor.
