Patna, Nailar:
U Myntri barim jong ka Bihar u Tej Pratap Yadav, u la pynbna ha ka sngi Ba-ar ban thaw ïa ka kynhun synrop jong ki san tylli ki seng kiba rit ban ïakhun ïa ka ilekshon sha ka ïing dorbar thawaiñ jong ka jylla ba shaphang Mihngi.
U Yadav, uba dang shen, u la shah beh na ka seng RJD, ha u kpa jong u bad uba dei ruh u heh nongïalam jong ka seng, u Lalu Prasad, ha kaba u la pynbna ïa kane, ha ka jingïalang bad ki nongthoh khubor, ha kaba la ïashim bynta ruh da ki National president jong ki san tylli ki seng.
Kitei ki san tylli ki seng ki long ka Vikas Vanchit Insaan Party (VVIP), Bhojpuriya Jan Morcha (BJM), Pragatisheel Janta Party (PJP), Wajib Adhikar Party (WAP) bad ka Sanyukt Kisan Vikas Party (SKVP).
U Yadav, u la ong ba un ïakhun ïa ka ilekshon sha ka ïingdorbar thawaiñ, kaba dei ban long ha kaba kut jong une u snem, na Mahua konstitwensi kaba u la mihkhmat haduh u snem 2020 ha kaba ka RJD ka la pynkynriah noh ïa u sha Hasanpur.
“Ki briew ki laitluid ban lehbeiñ ïa nga, hynrei ngan ïaid la ka jong ka lynti. Ka jingïatreilang jong ngi kan ïaid shakhmat lang ban pynthikna ïa ka jingbishar hok ha ka imlang-sahlang bad ka jingkylla kaba pura jong ka Bihar.”
“Lada ki briew ki ai ïa ngi ïa ka jingbit, ngin trei na ka bynta ban kyntiew ïa ka jylla. Ngin trei ban pynurlong ïa ki jingangnud jong u Ram Manohar Lohia, Karpoori Thakur bad u Jayaprakash Narayan,” u la ong.
U Yadav u la ong ba un ïakhun ïa ka ilekshon na ka Mahua Assembly konstitwensi kum u kyrtong shimet.
“Ki briew ki kyrshan ïa nga, bad bun bah ki briew mynta ki ïasoh bad ka ‘Team Tej Pratap Yadav’ jong nga, ka lad pathai khubor Social Media ban ïakynduh ïa ki briew,” u la bynrap.
U Tej Pratab Yadav u la shah beh seng ha ka 25tarik, Jymmang, na ka bynta 6 snem, hadien shisngi, ba la ïathuh ba u la phla ba u don “ha ka jingïadei” bad kawei ka kynthei kaba kyrteng ka Anushka.
U Lalu Prasad ruh u la kyntait ïa u Tej Pratap namar ka jingbym don jingkitkhlieh jong u.
Hadien katto katne sngi, hadien ba u la shah beh na ka seng, u Tej Pratap, u la kynnoh ba ka don ka “jingthmu” ban pynlong ïa ka jingïakynad hapdeng jong u bad u para jong u, u Tejashwi Yadav.
