Ka dei ka jingkylla niam bad bud noh ïa ka jinghikai niam kiwei ki jaitbynriew ka pynduh noh ïa ka jinglong kyrpang bad tynrai ka jaitbynriew Khasi – pnar. Haba ngi la ïa bud ïa ka niam nongwei ngin sa duh ïa ka Identity jong ngi kum ki Khasi bad ngin sa sah sa tang ka nam Khasi ha kane ka sla pyrthei.
Kawei pat ka jingai jait sha ka kmie ne kynthei kan sa pynduh ïa ka jinglong kyrpang ka jaitbynriew Khasi jong ngi. Namar balei nga ong kumne ka long namar kiwei ki jaitbynriew jong ka pyrthei ki wan ai symbai ne shong-kha hangne ha ri Khasi bad ki kam ba ki khun jong kiba ki dei ki Khasi namar la kha ïa ki da ka kmie Khasi ba ioh kpa da u dkhar, ki phareng, ki china, ki Negro bad kiwei kiwei ki jaitbynriew ka pyrthei bad ki ioh ïa ka jait kmie bad ki long Khasi.
Kine ki khun jong ki kpa bym dei Khasi ki kam ba ki dei ki Khasi namar ki shim jait bad bud ïa ka kur ka jait ka kmie Khasi. Dei hangne keiñ ba ka jaitbynriew jong ngi kam long shuh kaba kyrpang kumba ju ong ha ka por mynbarim. Ka jingai jait kmie ka pynduh noh ïa ka tyrnai jinglong ka jaitbynriew.
Namar ngi duh noh ïa ka snam Khasi, ka dustur ka riti. Bad ïa ka dur ka dar, ka rynïeng ka rynïot Khasi tynrai bad ngin sa sah tang ka nam jait Khasi. Hynrei ka rukom im kam dei shuh ka rukom im Khasi ka dei ka rukom im bar jylla kum ki kpa jong ki. Ka jing-ai jait sha ka kmie ka pynshlur ruh ïa ka shongkha khleh bad ka shongkha khynnah.
C. B. Iawphniaw
