New Delhi, Risaw:
Ka kynhun National Investigation Agency (NIA) ka la mudui da ka mukotduma ha kaba ïadei bad ka jingbuhai shnong be-aiñ sha US na kawei ka jaka sha kawei pat, da kaba ong ba ki nongkhaïi ki lum pisa na ka bynta jong ka bad ki phah shabar ri lyngba ka jingleh beaiñ.
U Sunny, uba sah ha Dharamshala jong ka Himachal Pradesh, bad u Shubham Sandhal, ba la tip kyrteng kum u Deep Hundi, uba na Peeragarhi ha Delhi, kiba la shah kem ha u bnai Naitung mynta u snem, ki dei napdeng kiba la paw kyrteng ha katei ka kot pynngat mukotduma.
U Gagandeep Singh ba la tip kyrteng kum u Goldy, uba la ithuh kum u nongsynshar ba kongsan, u la shah kem ha u bnai Lber.
Ha ka jingpynbna ha ka sngi Palei, ka kynhun NIA ka la ong ba ka la lap ba u Sunny u donkti ha kaba ïadei bad ka jingkyntiap jaka jong ki briew ba la rung beaiñ na kawei ka jaka sha kawei pat.
Ka la bynrap ruh ba u don ha Mexico naduh u snem 2021 haduh u snem 2023 bad u la ïatreilang bad u Goldy bad kiwei ban pynsuk ïa ki kam khappud beaiñ bad ban set beaiñ ïa ki nongshah pynïap.
“U la ïoh ïa ka jingsiew lyngba ka kam beaiñ bad ka jingphah pisa na ki bank. Wat hadien ba u la wan phai sha India ha u snem 2023, u la bteng ban pynïaid beit ïa ki kam pynpoi mar, ban pynïaid ïa ki kam hawala, bad ban phah beit beit ïa ki nongshah ktah lyngba ka jingkyntiap jaka,” ong ka kyrwoh.
Ka tnad ka la khot ïa u Sandhal kum u Agent beaiñ uba trei khamtam eh ban pynsuk ïa ka jingphah pisa beaiñ na ka bynta ka kynhun khaïi briew, kaba la ïalam da u Goldy bad ki paralok jong u.
Ka NIA ka la kdew ïa ki jingtohkit bad ka la ong ba u Sandhal u la lum pisa na ki briew kiba u dei ban ïarap na India bad phah shabar ri da kaba pyndonkam ïa ka kynhun beaiñ.
“Ka kamram jong u ka long ban pynïaid beaiñ bad pynkynriah ïa ki pisa beaiñ ha kylleng ka India, Mexico, bad US kum shi bynta jong ka jingthombor ïa ki nongwan rung beaiñ”, la ong ka tnad.
Ka NIA, ka ïathuh ba u Goldy, u bym don kano kano ka licence/jingbit katkum ka jingtreikam ka aiñ/jingpynrung kyrteng, na ka bynta ban phah ïa ki briew shabar ri, u la pyndonkam da kane ka rukom leit jingleit, na kawei ka jaka sha kawei pat ban kit ïa ki briew sha US, lyngba ka Spain, El Salvador, Guatemala, bad Mexico.
Ka la bynrap ba ka tnad ka la bteng ïa ka jingtohkit jong ka pyrshah ïa kiwei pat ki nongshah kynnoh ha kane ka mukotduma, bad ka la trei “ban pynduh pyndam noh ïa ki kynhun khaïi be-aiñ kiba kum kita kiba donkti ha kaba thok bad pyndonkam bakla ïa ki briew kiba lui lui da ka jingkular thok ban ai da ki visa ba long aiñ”.
Ka US naduh u bnai Kyllalyngkot 2025 ka la beh noh ïa ki 388 ngut ki nongwan buhai shnong na India ki bym don kot don sla.
Na kine, 333 tylli la pynher da ki lai tylli ki liengsuiñ ba kyrpang sha Amritsar.
Ka kynhun tohkit ba kyrpang jong ki pulit Punjab kaba tohkit ïa ki kynhun khaïi briew ba beaiñ kiba la shah mudui halor kiba bun tylli ki mukotduma.
Uwei u heh sorkar u la ong ba ka NIA ka dang ïakynduh bad ki bor jong ka aiñ ha US bad Canada halor ki nongkhaïi briew kiba don ha kito ki ri. Ka tnad pynjari aiñ ka dang tohkit ruh ïa ki nongwan rung be-aiñ sha US bad Canada lyngba ka lynti jong ki samla pule.
