Mangaluru, Jylliew:
U Nizam Ibrahim, nongïalam ka Youth Congress bad u Jitesh, u nongïarap ba ïajan jong u, ki la shahkem ha ki pulit jong ka Urwa ha Mangaluru, halor ka jingkynnoh ba ki la shet kylla ïa uwei u nongkhaïi bad klop pisa haduh T.2.77 klur da kaba byrngem ban pynmih ïa ki dur bad ki durkhih jong u.
Katkum ka jingong jong ki pulit, la ïathuh ba une uba shah kynnoh u la dawa pisa na u nongkhaïi ha ka por kaba la jan dap ar snem.
La kynnoh ba katei ka skhim ka la sdang naduh ba u Jitesh u la dawa pisa T.35 lak na une u lanot, ha kaba la byrngem ban pyllait bad pynsaphriang ïa ki dur bad ki durkhih kiba ïadei bad u.
Naba sheptieng bad pyrkhat ban lait na ka jingshah pynkhlemrain, une u nongkhaïi u la sei ïa lai tylli ki Cheque ar tylli kaba mar T.10 lak bad kawei pat na ka bynta T.15 lak.
Ki nongtohkit ki la ïathuh ba u Jitesh u la lah ban sei ïa ka pisa kaba T.20 lak, katba ïa ka check kaba sah kaba T.15 lak ym shym la lah ban pyndap pisa namar ka jingbym biang ka pisa ha ka account jong une u nongkhaïi.
Hadien kata u la leit sha ka jaka sah jong utei u nongkhaïi bad la kynnoh ba u la bteng ban pynbor ïa u ban siew.
Katba ki jingdawa ki nang jur, utei u briew u la leit sha u Nizam Ibrahim, uba trei ha katei ka kompeni jong u, ban pan jingïarap.
Ki pulit ki la kynnoh ba ha ka jaka ban ïarap ïa utei u nongkhaïi, u Nizam u la kylla long shi bynta jong ka kam dawa pisa.
Ban pynjur ïa ka jingpynbor ïa une u nongkhaïi, une uba la shah kynnoh u la leh mynleh ban ong ba ka jingïap jong u Jitesh ka dei ba u shim hi ïa la kajong ka jingim, ha kaba kane ka jingïasuhbuit ka la nang pyntieng pynsyier shuh shuh ïa une u nongkhaïi.
Hapoh ka jingbyrngem bad jingpynbor kaba ïai bteng, la ngeit ba une u nongkhaïi u la siew haduh T.2.77 klur ha ki ar snem.
Katei ka jingleh thok, ka la paw pyrthei, haba une u lanot, u la ïohi khlem poi pyrkhat ba u Jitesh ba u dang im bad u la ïohi ïa u ha Mangaluru, hadien ba u la shah pynngeit ba u la ïap.
Haba u la sngewthuh ba u la shah thok, une u nongkhaïi u la leit sha ki pulit jong ka Urwa bad u la ujor ejahar pyrshah ïa kine ki arngut.
La buh jingmudui da ka mukotduma ha Urwa Police Station katkum ki kyndon 308(5) bad 351(2) jong ka BNS. Ka jingtohkit kaba kham bniah ka dang ïaid shakhmat.
Ha kajuh ka por, ka kynhun Youth Congress jong ka Dakshina Kannada distrik ka la weng kam noh ïa u Nizam Ibrahim na ka jinglong dkhot ba hakhmat jong ka seng namar ka jingkynnoh ba u leh pyrshah ïa ka seng bad khlem bud ïa ki kyndon.
Ïa kane ka hukum weng kam la pynmih da u president jong ka district Youth Congress u Ibrahim Nawaz.
