New Delhi, Risaw:
Ka kynhun Myntri jong ka sorkar pdeng ka la dep ban rai ban rakhe ïa ka jingdap 150 snem jong ka jingrwai ïeid ri ‘Vande Mataram’ ha kylleng ka ri India. Ka Constituent Assembly ka la ai ïa ka kyrdan jingrwai ïeid ri ïa ka ‘Vande Mataram’, kaba la thaw da u Bankimchandra Chatterji.
Haba pynshai sha ki nongthoh khubor halor ki rai ba la shim da ka kynhun Myntri ka sorkar pdeng, u Myntri ka sorkar pdeng u Ashwini Vaishnaw u la ong ba da kaba buh ha ka jingmut ïa ka bynta ba ka jingrwai ka la leh ha ka por jong ka jingïaleh laitluid, la shim ïa ka rai ban pynlong ïa ka jingrakhe ha ka ri baroh kawei ban rakhe ïa ka jingdap 150 snem jong ka.
Kat kum ka portal ‘India.Gov’ la ong ba ïa ka Vande Mataram la thaw ha ka ktien Sanskrit da u Chatterji. Ka don ka kyrdan kaba ïaryngkat bad ka jingrwai ri, ka Jana-gana-mana.
