Srinagar, Risaw:
Naba la sakhi ba ka la don ka jingbha jong ka jinglong jingman, baroh ki jaka pule haduh klas 8, ki la plie biang ha ka sngi Thohdieng ha ka Leh distrik jong ka Ladakh Union Territory, kaba la shah ktah bha ha ki kam thombor, ha kaba saw ngut ki briew ki la ïap bad 80 ngut kiwei pat ki la mynsaw na ka jingshah thombor ha ka 24 tarik u Nailur ha ka por ba don ki jingïakhih halor ka jingdawa jylla bad ka 6th Schedule.
Katkum ka jingong jong u Assistant Commissioner Leh, u Shabir Hussain, “Ka bor synshar ka la ailad ruh ïa ki bos rit ban ïaid hapdeng ka por 10 baje mynstep bad 6 baje janmiet ha ka 3 tarik u Risaw, da kaba bud ryntih ïa ki kyndon ba la buh katkum ka kyndon 163 jong ka Bharatiya Nagarik Suraksha Sanhita.”
La bthah ruh ba baroh ki dukan hapoh ka distrik kin plie naduh ka por 10 baje mynstep haduh ka por 6 baje janmiet. Hynrei ka Mobile internet kan dang bteng ha ka ban shah pynsangeh treikam, u la bynrap.
La pynjari ïa ka pakhang shnong ha Leh distrik hadien ba ka jingïakhih kaba jai jai ban ïoh ïa ka jylla bad ka jingdawa jong ka 6th Schedule ha ka 24 tarik u Nailur ka la kylla long kaba shyrkhei, kaba la pynlong ïa ka jinghiar thma ïa ka ophis jong ka BJP bad CEC Leh Hill Council, bad la thang ïa ki kali jong ki pulit bad CRPF, bad pynjulor ïa ki jingdon jingem jong ki riew paidbah bad ki riew shimet.
Naduh ki lai sngi ba ladep, ki bor synshar ki la pynjem ïa ka pakhang shnong kaba man ka sngi ha katei ka distrik.
“Da ka jingbha jong ka jinglong jingman bad ym shym la don kano kano ka jingjia kaba sniew kaba la pyntip hadien ka 24 tarik u Nailur, la rai ban plie biang ïa ki skul haduh ka klas 8 mynta ka sngi,” ong uwei u heh sorkar hynnin ka sngi.
Ka bor synshar jong u Lt Governor ha Ladakh ha ka sngi Palei ka la pynbna ban pynlong ïa ka jingtohkit Majisterial halor kitei ki saw ngut kiba ïap. La thung ïa u Inquiry officer bad la bthah ïa u ban pyndep ïa ka jingtohkit hapoh saw taïew.
Ka Leh Apex Body (LAB) bad ka Kargil Democratic Alliance (KDA ), kaba dei ka jingïatylli jong ki kynhun saiñ pyrthei, ka imlang sahlang, ka khaïi pateng, bad ki kynhun niam bapher bapher jong ka Leh bad Kargil distrik kiba lamkhmat ïa ka jingïakhih na ka bynta ka 6th Schedule bad ban pynïoh jylla ïa ka Ladakh, ki la dawa ïa ka jingtohkit jong ka ïingbishar halor ka jingshah thombor ha ka 24 tarik u Nailur.
Baroh ar tylli ki KDA bad ka LAB ki la weng noh na ka jingïakren bad katei ka pdeng bad ki la ong ba ka jingïakren ka lah ban sdang biang tang ynda ka sorkar ka la hukum ban tohkit ïa ka aiñ halor ka jingshah thombor ha ka 24 tarik u Nailur.
Ki la dawa ruh ban pyllait lut ïa baroh kiba la shah set, kynthup ïa u nongtrei mon sngewbha uba dei ruh u nongïakhun pynneh mariang, u Sonam Wangchuk bad ban weng noh ïa baroh ki jingkynnoh pyrshah ïa u.
Ha kajuh ka por, uwei u nongkyrshan jong u Sonam Wangchuk, la kynnoh ba u la pynïap ïalade.
“Katkum ka jingïathuh jong ki hynmen jong u, u la shah ktah ka jingmut jingpyrkhat na ka daw ki jingsngewsih hadien katei ka jingjia, kumba ka paw, ka jingïap jong u, ka don jingïadei ruh bad ka jingjia ha ka 24 tarik u Nailur, namar ba u lah ban ym sngewtynnad ïa kiei kiei bad lehse, u la pynïap ïalade”, la ong u Co-chairman ka LAB, u Chering Dorjay.
