Srinagar, Risaw:
Ki pulit ha ka sngi Saitjaiñ ki la kurup ïa ki jingdon jingem kiba shongdor T.2 klur jong ka Sajjad Gul, u nongseng ïa ka kynhun lehnoh ‘The Resistance Front’ (TRF) kaba dei ka tnat jong ka kynhun lehnoh Lashker-e Toiba, kaba la shah kynnoh donkti ban leh ïa ka kam thombor ha Pahalgam ha ka 22 tarik, Ïaïong ha kaba ki la don kumba 25 ngut ki nongjngohkai pyrthei bad uwei u trai shnong uba ju ñiah kulai kiba la shah pynïap.
U nongaiktien jong ki pulit u la ïathuh ba ki pulit ki la pynïasoh ïa kawei ka ïing sah kaba lai mala kaba la shna palat ïa ka jaka kaba heh haduh 15 marla (Survey No. 43 min, Estate Khushipora), kaba don ha Rose Avenue, HMT.
Katei ka jaka, kaba shong dor kumba 2 klur tyngka, ka dei kaba la buh jingthoh ha ka kyrteng jong u Ghulam Mohammad Sheikh, S/o Khawja Anwar Sheikh, u kpa jong u Sajad Ahmad Sheikh uba la tip kyrteng kum u Sajad Gul katkum ka jingkheiñ khajna bad ka jingpynshisha na ka Tehsilgarna Central, Shalteng, Srinagar.
U nongaiktien jong ki pulit u la ïathuh ba ïa kane ka jingkurup la pyndep ha kaba ïadei bad ka ejahar No. 235/2022 katkum ki kyndon 13, 38, 20 UAPA bad 2/3 EIMCO Act, ba la mudui ha Police Station Parimpora.
“Ïa ka jingtohkit la sdang katkum ka kyndon 25 jong ka aiñ ïada ïa ki kam be-aiñ (UAPA), kaba ai bor ïa ki bor synshar ban pynïasoh ïa ki mar ki mata kiba la pyndonkam ne thmu ban pyndonkam na ka bynta ki kam lehnoh,” u la ong.
Ïa kane ka jingleh la pynlong ha ka jingdonlang jong u Executive Magistrate ba dei peit ïa kane ka kam. U nongaiktien jong ki pulit u la ong ba watla katei ka jaka ka dei kaba la mudui ha ka kyrteng jong u kpa jong utei u lehnoh, hynrei ka jingtohkit ka la pynpaw ba u Sajad Gul u dei u nongshim bynta uba trei shitom.
“U Sajad u la don bynta ban pynsuk ïa ki kam lehnoh, ban pynïaid ïa ki jingpynbna pyrshah ri, bad ban pynmih ïa ka jingbym sngewtynnad pyrshah ïa ka sorkar lyngba ki Online bad ki Social Media bapher bapher,” u la ong.
Katkum ka jingong jong ki pulit, katei ka jingshah pynngat ka long shi bynta jong ka buit treikam kaba dang ïaid shakhmat jong ki pulit ka Srinagar ban pynthut ïa ka pisa tyngka, ka jingpynpoi marbam, bad ka jingtreikam jong ki kam lehnoh, kynthup ïa ki nongkyrshan bad ki nongsngewrit jong ki kiba ïaid palat pud.
“Ka jingleh ka phah ïa ka khubor kaba shai ba ki briew ne ki kynhun kiba ïarap ïa ki kam lehnoh kin mad ïa ki jingpynshitom kiba tyngeh katkum ka aiñ, kynthup ïa ka jingshah knieh noh ïa ki mar ki mata kiba la ïoh be-aiñ,” la bynrap shuh shuh ki pulit.
Ka TRF ka la mih hadien ba la pynduh noh ïa ka kyndon 370. Katkum ka jingong ki pulit ka la donkti ha kiba bun ki kam thombor jong ki lehnoh kynthup ïa ka jingshah thombor ha ka 22 tarik, Ïaïong ha Pahalgam.
