Amaravati, Risaw:
U Myntri Rangbah ka jylla Andhra Pradesh u N Chandrababu Naidu ha ka Sngi U Blei u la ïakren bad ka Myntri ka tnad Tribal Welfare ka Gummadi Sandhya Rani, bad wad jingtip halor ka jinglong jingman jong ki koidi jong ka Tribal Girls Gurukulam ha Kurupam kaba don ha Parvathipuram Manyam distrik, kiba la kem pang.
U Naidu u la kylli ruh ïa ka halor ka jingïap jong u khunlung ha ka jaka sumar khyllung ha Anantapur distrik, bad bthah ïa ki heh sorkar ba kin tohkit ïa baroh ar tylli ki jingjia, bad ban ai kham kloi ïa ka kaiphod.
Kumba la bthah da u Naidu, ka Sandhya Rani ka la leit jngoh ïa ka King George Hospital ha Visakhapatnam ban tip ïa ka jinglong ka koit ka khiah jong ki samla pule kiba dang shah sumar mynta.
U Anantapur District Collector u O Anand ha ka sngi U Blei u la ong ba la thaw ïa ka komiti kaba don lai ngut ki dkhot ban peit ïa ka jingïap jong u khyllung ba dang kha ha Shishu Gruha.
Ka DMHO EB Devi, ka Project Director jong ka ICDS ka M Nagamani, bad u Dr Ravikumar jong ka GGH Pediatric Department ki dei ki dkhot jong kane ka komiti.
U la bthah ïa ka komiti ban ai ïa ka kaiphod kaba bniah kham kloi katba lah hadien ba la tohkit ïa ka jingjia. Yn shim khia pyrshah ïa ki nongtrei kiba leh bakla katkum ka kaiphod tohkit, u la ong.
Ka komiti ka la leit jngoh ïa ka Shishu Gruha ha ka sngi U Blei, bad ka la kylli jingkylli ïa ka Manager ka Deepthi, ka nongpynïaid ka Sridevi, ka nongtrei ka imlang sahlang ka Lakshmi Devi, bad kiwei kiwei ki nongtrei kyrpang ha kaba ïadei bad ka jingïap jong u khyllung.
