Bhubaneswar, Risaw:
Ki la don palat 200 tylli ki ïingtrep kiba la shah pynjulor bad palat 2,000 hectare ki jaka rep ki la shah rong noh ha ka por ba jur u slap uba la lynshop ïa ka Koraput distrik naduh ka 1 haduh ka 3 tarik u Risaw.
Ki tyllong khubor ki ïathuh ba ka jinghap slap kaba jur ha ki Block ba kynthup ïa ka Laxmipur, Semiliguda, Lamtaput, Jeypore, Kotpad, Kundra, Bandhugaon, bad Dasmantpur ka la wanrah ïa ka jingjulor kaba shi bynta lane baroh jong kiba bun tylli ki ïing. Ym shym la lah ban pynlong ïa ka jingjurip kaba biang ïa ki jingjulor jong ki ïing bad ki jingthung jingtep namar ka jingsniew jong ki surok bad ka jinglong ka suiñbneng. Kiba bun ki nongshong shnong kiba shah ktah ki la mad ruh ïa ka jingeh ban poi sha ki jaka treikam jong ki Block ne Panchayat ban pyntip ïa ka jingshah pynjulor.
Ka jingduhnong kaba khraw halor ki jingthung jingtep, khamtam ïa u kba, la ïathuh ba ka la jur bha ha kine ki Block kiba kynthup ïa ka Jeypore, Kotpad, Kundra bad Borigumma, ha kaba palat 2,000 hectare ki jaka rep ki la shah rong noh bad shah tap ha ka um.
U Narendra Pradhan, uba long u Convenor jong ka Koraput Krushak Kalyan Manch, u la ong, “Kiba bun ki lyngkha kba ki la shah tap ha ka um namar ka jingjur jong u slap uba la ïai bteng, bad ka jinglong jingman jong ki jingthung jingtep ka long kaba sniew namar ka jingshlei um palat. Ka long ka por kaba khia na ka bynta ki kynhun sorkar ban pynkhreh na ka bynta ki kaiphod halor ki jingjulor jong ki jingthung jingtep bad ban pynbiang ki lad jingïarap na ka bynta ki nongrep kiba la shah ktah jur.”
Ka bor pynïaid distrik ka la bthah ïa ki Tehsildar bad ki BDO ba kin ai ïa ki kaiphod ba bniah halor kino kino ki jingduh ei ki mynsiem briew bad ki jingdon jingem bad ban ai jingïarap mardor ïa kiba shah ktah jur. Uwei u heh na ka tnad Emergency jong ka distrik u la ong, “Ngi la ïoh ïa ka kaiphod ba la julor haduh 40 tylli ki ïing trep ha ki Block bapher bapher bad katto katne ki jingthung jingtep ha ka Block Bandhugaon haduh mynta. Hynrei la khmih lynti ïa ki kaiphod ba thikna halor ka jingjulor ha ka lah sngi U Blei jong ka taïew ban wan.”
