Lucknow, Risaw:
U heh nongïalam jong ka seng Samajwadi Party, u Akhilesh Yadav, u la poi ha ka ïingsah jong u Azam Khan ha ka por mynstep, uba dei u nongmihkhmat ba la rim bha jong katei ka seng bad uwei na ki nongïalam jong ka bad u long u nongïalam ba la ju ïather bha ha ki por ba la leit.
Kane kam dei tang kawei pat ka jingleit jngoh, ka dei ka jingïakynduh kaba nyngkong eh jong ki hadien jan ar snem, naduh ba la pyllait ïa u Khan na phatok Sitapur ha ka 22 tarik Nailur. U Akhilesh u la her da ka liengsuiñ na Lucknow sha Bareilly, nangta u la ñiah da ka kali sha Rampur – ka jingleit kaba la ïohi ba ka dei ka jingleit ba shimet bad ha kajuh ka por halor ka kam saiñ pyrthei. Na ka bynta u heh SP, katei ka jingleit ka long kum ka dak jong ka jingpynïasuk.
Na ka bynta u Khan, ka la long ka khyllipmat ban pynskhem biang ïa ki jinglong ba rim hapdeng ki jingkyrhuh jong ka jingphet seng. “Ngan ïakynduh tang ïa u Akhilesh” Khyndiat kynta shuwa ban wan poi u Akhilesh, u Azam Khan u la pynbna. Haba kren sha ki nongthoh khubor shabar ka ïing sah jong u, u la ong da kaba skhem, “Kam don kano kano ka prokram. U Akhilesh Yadav un ïakynduh ia nga, bad ngan ïakynduh tang ïa u. Haba kylli ïa u shaphang ka jingïakynduh ïa u MP ka Rampur, u Maulana Mohibullah Nadvi, u la jubab lyngkot, “Ngam tip ïa u.” Ka la paw shai – ka jingïakynduh ka long ban long kaba shimet ne ka bym shym khmih lynti.
Ha ki taïew ba ladep, ki khubor ki la saphriang ba u Azam Khan u lah ban kynriah sha ka BSP jong ka Mayawati. Hynrei une u riewkhlaiñ bor jong ka Rampur, uba la mad ïa ki phew tylli ki mukotduma bad ka jingshah iehnoh marwei ha ka saiñ pyrthei, u la pynrem ïa ka jingkynthoh da ka jingpyrshah kaba pawnam. “Ngi don kaei kaei kaba ki khot ka jinglong,” u la ong.
“Ka jinglong kam shong ha kaba bat ïa ka kam – ka mut ba ki briew ki ïeid bad burom ïa ngi. Ngim dei kiba lah ban die, bad ngi la pynshisha ïa kata.” Ki ktien jong u ki long ka jingkyntait bad ka jingpynbna , ka khubor ba, wat hapdeng kiei kiei baroh, u dang iohi ïalade kum shi bynta jong ka jingïathuhkhana jong ka Samajwadi.
Ka jingshaniah kaba thymmai jong u Khan ka wan hadien ba la pynsangeh biang ïa ka aiñ. Ha ka 18 tarik u Nailur, ka Allahabad High Court ka la ai jamin ïa u ha ka mukotduma kurup jaka jong ka Quality Bar. Kham mynshwa, ha ka 10 tarik Nailur, u la ïoh jamin ha kawei pat ka mukotduma kaba ïadei bad ka jingkynnoh pynkynriah jaka jubor ha Dungarpur Colony kaba don ha Rampur.
Ym pat slem, la pyllait ïa u ha ka mukotduma kaba 17 snem kaba ïadei bad ka pakhang surok bad ka jingpynjot ïa ki jingdon jingem jong ki paidbah. Ha kine ki snem, u Khan u la mad ïa ki 16 tylli ki ejahar kiba kynthup ïa ki jingshah kynnoh bapher bapher, hynrei ka jinglong jingman ka i kumba ka la nang kylla.
