Patna, Risaw:
U Lalu Prasad, uba long u Myntri Rangbah barim jong ka Bihar, uba dei ruh u radbah jong ka seng RJD, u dei uba la pawnam na ka bynta ka jubab kaba sngewtynnat bad kaba lyngkot jong u ïa ki nongïaleh pyrshah kam saiñ pyrthei jong u. Tang mar ïa pynbna u Chief Election Commissioner u Gyanesh Kumar ïa ka por thep vote na ka bynta ka ilekshon sha ka ïingdorbar thawaiñ jong ka Bihar bad ong ba ka ilekshon kan long ha ki ar bynta, kaba nyngkong ha ka 6 tarik u Naiwieng bad kaba ar ha ka 11 tarik u Naiwieng, u Lalu u la kloi ban ai jingmut halor ka rynsan ‘X’, ‘Chhah aur gyarah, NDA nau do gyarah’. U Lalu u la antad ba ka NDA kan shah rem ha ki ilekshon. U nongïalam ka BJP uba dei ruh u Symbud Myntri Rangbah ka Jylla u Samrat Chaudhary u la jubab ha kajuh ka sur, da kaba ong ‘kynmaw Lalu Ji, ka 14 tarik Naiwieng (ka tarik ñiew vote) la rakhe kum ka sngi jong ki khynnah ne ka Children’s Day. Kumta, ha kata ka sngi u Lalu Ji un tip mano ba dei u khynnah ba shisha.
‘Ho nyay agar to aadha do, yadi usme bhi koi baadha ho, to de do kewal 15 gram'(Lada don ka hok, ai shiteng na ka…Lada don kano kano ka jingkhanglad ha kata ruh…Te ai tang 15 gram)’. Kane ka dkhot na ka ‘Rashmirathi’ jong u myllung ba pawnam u Ramdhari Singh Dinkar ha kaba u Lord Krishna u wad ïa ka jingïasuk ha ka ïingbishar jong ka Mahabharata, ka la shem ïa ka jingsawa ha ka saiñ hima sima jong ka jylla ka ban sa wan. U Myntri ka sorkar pdeng bad u nongkyrshan jong ka Hindustani Awam Morcha u Jitan Ram Manjhi u la sot ïa ka kyntien na ‘Rashmirathi’ ban pynpaw ïa ka jingdawa jong ka seng jong u ban ïoh kham bun ki seat ban ïa kaba la tyrwa da ka seng ba ïatreilang ka BJP. U la dawa ym duna ïa ki 15 tylli ki seat ban ïakhun ïa ka ilekshon.
Katba ka Bihar ka dang pynkhreh na ka bynta ka elekshon sha ka Ïingdorbar Thawaiñ ka ban sa wan, ka jingkyrmen kaba pher, kum ka jingkhot kaba buh jingkyrmen ka ‘Rasgulla elekshon’ ka la khring biang ïa ka jingmut jong ki riewsaiñ pyrthei. Kum shi bynta ban buh jingkyrmen halor kane, la sam ha Panditji Mithai Dukaan ha ka nongbah bakhuid jong ka Gayaji da ki jingbam thiang, ne ki ‘rasgulla’ kane kam dei tang ka jingbam ba thiang hynrei ka dei ka dak jong ka jingkyrmen na ka bynta ki nongïalam kiba ïakhun ilekshon. Katto katne ngut ki nongmihkhmat jong ka thaiñ bad ki riew saiñ pyrthei kiba pawnam ki leit jngoh ïa katei ka dukan kaba don ha Panchanpur, da kaba kyrmen ba ka jingbam ïa kine ki jingbam thiang kaba pawnam ka lah ban wanrah ïa ka jingjop ha ka ilekshon. Kane ka rukom ka la bteng la jan sanphew snem ha kaba u ‘rasgulla’ bym don jingma u la ïoh ïa ka nam kaba la saphriang shabar jong ka Gayaji.
