Patna, Naiwieng:
Ka General Secretary jong ka seng Congress ka Priyanka Gandhi Vadra, ha ka sngi Saitjain, ka la kam ba ka seng jong ka, mynta, ka ïakhun ïa kajuh ka thma pyrshah ïa ka “hima u Modi” kaba u Mahatma Gandhi, shisien, u la ïakhun pyrshah ïa ki nongsynshar hima sima jong ki phareng.
Haba kren halor ki jingjia kiba la jia ha Bihar ha Kadwa (Katihar), Purnia bad Barari ha ka thaiñ Seemanchal kaba bun ki Muslim, ka Vadra ka la ther ïa u Modi namar ba u la pyndonkam ïa ki kyntien kum ‘katta’ (ka suloi ba la shna da ka ri) kiba ka la ong ba kim ïahap ïa u Myntri Rangbahduh ka ri.
Ka la kdew ruh kumno, ha kawei ka liang, u Myntri Rangbahduh u ïaroh ïa ka ‘Vande Mataram’, kaba ïeng na ka bynta ka jingbym pyndonkam tiar ïaleh bad ha kawei pat ka liang, u pyndonkam ïa ki kyntien kiba pynmong ïa ka burom jong ka ophis bad ka kyrdan jong u.
Ka Vadra ka la ong ba ka sorkar NDA ha Bihar ka la long ka jingkitkhlieh na ka bynta ka jinglong jingman kaba sngewsih ha kane ka Jylla.
“Ka jingbym don ki lad ki lynti ha Bihar ka la pynbor ïa ki samla jong ka ban wad kam sha kiwei pat ki bynta jong ka ri”, ka la ong.
Ka la kynnoh ruh ïa ka jingpynduh pisa bad ka jingpyntreikam bakla ïa ka GST na ka bynta ka jinghiar dor jong ki kam rit kam ria, kaba la pynjot ïa ki lad kamai.
Ka Vadra ka la kynthoh ruh ïa ka sorkar NDA kaba la kynnoh ba ka la aiti lut ïa baroh ki kam paidbah sha ki “arngut ki paralok baïatreilang” jong u Modi.
“Ki nongïalam ka kynhun NDA ki ïai kren ïa ki hynñiew phew snem jong ka jingsynshar ka Congress ha India. Ki dei ban tip ba ki sorkar Congress mynshwa ki tei ïa ki jaka pule kum ki IIT, IIM bad AIIMS”, ka la ban jur.
Ha kaba ïa dei bad ka jingai pisa shwa ka ilekshon sha ki kynthei ha Bihar da ka sorkar NDA, kane ka nongïalam ka Congress ka la ong ba ka BJP ka pyrshang ban ai pisa ïa ki.
“Ka NDA ka pyrkhat ba kin ai pisa 10 hajar tyngka ïa ki kynthei ba kin ïoh vote”, ka la ong.
“Katba ki ram jong ki Corporate House ki dang shah pyllait, ki briew kiba duk ki pynlut ïa ka jingim jong ki ban siew ïa ka sut jong ki ram kiba ki la shim na ka bynta ban hikai ïa ki khun ne ban pynshongkurim ïa ki khun jong ki,” la pynsngew ka Vadra.
Kane ka heh nongïalam jong ka Congress ka la ong shuh shuh ba naduh ba ki briew jong ka ri ki la sngewsih ïa ka BJP bad ki seng ba la ïatreilang bad ka, ka seng ka la sdang ban pyndonkam ïa ki kam bymman ha ka ilekshon ban neh ha ka bor synshar. Ka la kdew kyrpang ïa ka jingshah weng noh jong ki 65 lak ngut ki nongthep vote na ka thup nongthep vote ha Bihar shwa ka ilekshon sha ka ïingdorbar thawaiñ kaba dang ïaid shakhmat. Ka la ther tyngeh ruh ïa u CEC Gyanesh Kumar bad ïa ki Election Commissioner u Vivek Joshi & SS Sandhu namar ba ki donkti ha ka “jingtuh vote”.
Ka Vadra ka la maham ba ki nongshong shnong kin pynngat ïa ki ha ka jingkitkhlieh namar ba ki pynthut ïa ka synshar paidbah. Nangta ka la pynïaryngkat ïa ka jingïaleh jong ka Mahagathbandhan pyrshah ïa ka NDA bad ka jingïaleh jong ki nong India pyrshah ïa ka jingsynshar ki phareng.
Ha kajuh ka por, u MP ka Congress u Pramod Tiwari u la kynnoh ba ka NDA kaba synshar ka la mad ïa ka jingduhnong kaba khraw ha ka bynta banyngkong jong ka ilekshon sha ka ïing dorbar thawaiñ, da kaba pynskhem ba ka kynhun synrop ka Liang Pyrshah ka la pynkhreh ban ïoh 75 haduh 80 tylli ki seat.
U Tiwari u la kyntait ruh ba kiba bun ki kyrtong jong ka BJP kin sa ngat ha ka jingduhnong.
