Bengaluru, Nohprah:
Kumba la ïohlum jingkheiñ, la ong ba ki la don haduh 3,22,468 tylli ki aplikeshon na ka bynta ki Card Rashon kiba shah kynthup hapoh ka Below Poverty Line (BPL) ki dang sahkut ha kylleng ka Karnataka, ha kaba kiba bun eh ki dei kiba na ki distrik ba Shatei-lam-Mihngi jong ka Karnataka bad na Bengaluru.
Ka jingsahteng ka long ha Belagavi, Kalaburagi, Vijayapura, Raichur bad Koppal.
Haba jubab ïa ka jingkylli ba kongsan ba la wanrah da ka MLC Balkhees Banu ha ka jingïalang jong ka ïingdorbar thawaiñ kaba dang ïaid shakhmat ha Belagavi, u Myntri ka Food and Civil Supplies and Consumer Affairs u K H Muniyappa u la wanrah ïa ki jingtip katkum ki distrik halor ki aplikeshon kiba dang sahteng.
Katkum ka jingkheiñ, ka Belagavi ka wan hakhmat duh ha ka thup jong ki 39,019 tylli ki aplikeshon kiba dang sahteng, bud sa ka Kalaburagi kaba don 36,037 tylli, ka Vijayapura kaba don 24,293 tylli, ka Raichur kaba don 18,111 tylli, ka Bengaluru kaba don 18,035 tylli, ka Bidar kaba don 17,671 tylli, ka Bagalkot da 13, 658, ha Dharwad da 12,337, ha Koppal da 11,446 bad ka Ballari da 10,709 tylli.
U Myntri u la ong ba ka jingpynshisha ïa baroh ki aplikeshon kiba dang sahteng ka dang ïaid mynta.
U la kyntait ruh da kaba tyngeh ïa ki jingkynnoh ba la pynkylla ïa ki BPL card sha ka Non-priority Household (NPHH), kiba la ai sha ki nongïoh myntoi kiba shah kynthup ha ka Above Poverty Line (APL).
“Ym shym la pynkylla ïa ka card BPL sha ka card NPHH,” ong u Muniyappa ha ka ïing dorbar.
Haba wanrah ïa kane ka mat, ka Banu ka la ong ba ki longïing kiba duk, ki nongbylla sngi, ki nongñiah auto-rickshaw bad ki nongdie madan ki mad ïa ka jingeh kaba khraw namar ka jingkynnoh ba la pynkylla ïa ki card BPL sha ki card NPHH.
Ka la pynpaw shai ruh ïa u Myntri halor ka jingeh jong ki nongïoh myntoi kiba don ïa ki jingpang ba shyrkhei kum ka jingpang bampong, jingpang klongsnam bad jingpang khyllai, kiba shem jingeh ban ïoh ïa ki jingbam khlaiñ ba la ai jingïarap bad ka jingkyrshan ha ka liang ka koit ka khiah.
Haba jubab ïa ki jingeh, u Muniyappa u la ong ba lada don kano kano ka card BPL kaba la pynkylla shipor sha ka kyrdan NPHH, ki nongïoh myntoi kiba dei hok ki lah ban ai ïa ka aplikeshon kaba thymmai sha u tahsildar jong ka thaiñ ryngkat bad ki kot ki sla kiba ïadei hapoh 45 sngi naduh ba la pynkylla. Hadien ka jingpynshisha kaba biang, yn sa pynphai biang ïa ka jinglong tynrai jong ka BPL.
Na ka bynta kito kiba mad ïa ki jingeh ha ka liang ka koit ka khiah, u Myntri u la ong ba ka don ruh ka jingpynbeit ban apply ïa ka BPL card Online ban pynthikna ba kin ïoh mardor ïa ki jingmyntoi.
