New Delhi, Rymphang:
Ka seng Jan Suraaj Party jong u Prashant Kishor, u riewshemphang barim ha ki kam ba ïadei bad ki kam ilekshon, ka la rah sha ka Supreme Court, ban tuklar ïa ka ilekshon sha ka ïingdorbar thawaiñ jong ka Bihar, 2025 bad ban dawa na ka bynta ban pynlong da kawei pat ka ilekshon ha ka Jylla.
Lah ban kdew ba kane ka kam kan wan ha ka jingbishar ha ka sngi Thohdieng hakhmat ka ïingbishar jong u Chief Justice ka India u Surya Kant bad u Joymalya Bagchi.
Ka NDA ba ïalam da ka BJP, ka la bat ïa ka bor ha ka Jylla, ha kaba ka la jop 202 na ki 243 tylli ki seat, katba ka kynhun INDIA bloc, ka la ïoh tang 35 tylli, ba kynthup ïa 6 tylli ki Congress.
Ka Jan Suraaj Party, kam shym la lah ban ïakhun ha ka ilekshon sha ka ïingdorbar thawaiñ, ha kaba kiba bun na ki kyrtong jong ka, ki la shah rem.
Ha ka jingkyrpad jong ka, ka seng ka la kynnoh ba ka sorkar Bihar ka la pynkheiñ ïa ka Model Code da kaba ai pisa T.10 hajar marwei sha ki kynthei hapoh ka Mukhyamantri Mahila Rojgar Yojana hadien ba la pynbna ïa ka por thep vote.
Ka dorkhas ka la pan jingbthah na ka kynhun ba dei khmih halor ka ilekshon ban shimkhia katkum ka kyndon 324 jong ka Riti synshar ka ri (ka jingpeit, jingbthah bad jingpynïaid ïa ka jingpynkhreh ïa ki thup nongthep vote na ka bynta, bad ka jingpynïaid ïa baroh ki ilekshon) bad ka kyndon 123 jong ka aiñ pynïeng ïa ki paidbah pyrshah ïa ka jingai pisa beit sha ki nongthep vote kynthei ha ka jylla.
Ka Mukhyamantri Mahila Rojgar Yojana ka ai jingïarap pisa nyngkong kaba T.10,000 sha ki kynthei ban seng ïa ki kam rit kam ria bad ban kyntiew ïa ka jingseng kam lajong bad ka jingpynkupbor ïa ki kynthei ha ka jylla.
