Thiruvananthapuram, Rymphang:
Ka kynhun Enforcement Directorate ha ka sngi Palei, ka la pynlong ïa ka jingkhynra ha Kerala pyrshah ïa ki nongpynmih bad ki nongtrei ba kongsan jong ka Nedumparambil Credit Syndicate Group kum shi bynta jong ka jingtohkit ba la kynnoh ba ka don ka jingleh thok ha ka jingbei tyngka kaba ïadei bad ka jingthok pisa, la ïathuh ki heh ka kynhun.
Kane ka kynhun tohkit jong ka sorkar pdeng ka la ujor mukotduma katkum ka Prevention of Money Laundering Act (PMLA) da kaba shim khia ïa ka jingbun ki ejahar ba la ujor da ki pulit ka jylla halor ka jingkynnoh ba ki la leh thok ïa ki nongthep pisa da kaba lum pisa bad da kaba kular ban ïoh jingmih kaba heh.
Ka jingpeit bniah ïa ki Bank Account jong ki kynhun ka pyni ïa ka jingpynïaid pisa, ka jingpynkylla ïa ka pisa sha ki kynhun ba bun jait kiba ïadei, bad ka jingpynmih pisa kaba jur, ki la kynnoh. La suba ruh ba ïa kine ki pisa la thep ha ki jaka bym lah ban pynkylla ha ka jylla, la ong ki heh sorkar.
Ka jingtohkit kaba hashwa ka pyni ba katto katne ngut ki nongthep pisa ha kylleng ka Kerala ki la shah pynbor ban thep pisa kaba heh, ki bym shym la siew biang bad kim shym la ai jingmyntoi kumba la kular, ong ki heh jong ka kynhun ED.
