Bengaluru, Rymphang:
U Myntri ka tnad Excise jong ka Karnataka, u RB Timmapur, u la pynskhem ha ka ïingdorbar jong ka Assembly, ha ka sngi Ba-ar, ba um shym leh bakla satia, ha kaba ïadei bad ka jingshah kynnoh ba u la donkti ha ka jingdon ka jingkamai spah bymhok hapoh ka tnat Excise, kaba la kot da ki klur tyngka, bad kam don jingkylli satia, ba un iehnoh ïa ka kam jong u.
“Lada don ki heh kiba shim pisa tuh da kaba pyndonkam bakla ïa ka kyrteng jong u Myntri bad Myntri Rangbah ka jylla, dei ban shim khia pyrshah ïa u, kaei ka jingbakla kaba nga la leh ban dawa ïa ka jingphah iehnohkam jong nga?” u la kylli, haba jubab ïa ka jingdawa jong ki dkhot ka seng BJP.
Halor ka Audio ha kaba la kdew ïa ka kyrteng jong u bad u khun jong u, u Timmapur u la pynïanujor ïa ka bad ka jingkynnoh ba u Myntri Rangbah barim u BS Yediyurappa u ïakren bad ki MLA ka Congress bad ka JDS ban thied ïa ki, ha kaba khatduh la pynshisha ba ka dei kaba thok.
U la pynskhem ba ki jingkynnoh bamsap ha ka tnad Excise kim dei kiba dang thymmai, bad ki la mih ha man la ki sorkar, ha ka por ba u JH Patel bad u Yediyurappa ki dang long Myntri Rangbah bad wat ha ka por jong ka sorkar BJP kaba la dep, hynrei ym don uwei ruh uba la iehnohkam.
U la ong ba ka seng Federation of Wine Merchants’ Association, kaba la ujor sha ka Lokayukta, kam don ha ka liang ka jingstad namar ba kam shym la pynlong ïa ka jingïalang bah ne pynlong ïa ka jingpeit bniah man la u snem.
U Myntri u la kynnoh shuh shuh ba u la wanrah ïa ki jingpynkylla ban pynduna bad ban ïaleh pyrshah ïa ka bamsap, ym kum ki Myntri ba mynshuwa.
La shim ïa ka rukom ai jingmut na ka bynta ki jingpynkylla kam, ki ophisar kim shah ban trei ha ki distrik trai jong ki, bad kito kiba ïakynduh ïa ka jingshah weng kam kim shah ïa ki kam Executive, u la ong.
La pynkynriah noh ïa kito kiba trei palat san snem ha Bengaluru.
“Ki la don ki khep ba ki riew shimet ki don 100, 50 ne 40 tylli ki licence. Hato ki jaitbynriew kiba sahdien kim dei ban ïoh ïa ka lad ban ïoh licence? Dei na kata ka daw ba la pyntreikam ïa ka e-auction ha ka jingïatreilang bad ka MSTC, ka kompeni jong ka sorkar India. Hangno ka bamsap?” u la kylli.
U Timmapur, u ïathuh ba u Lakshminarayan, uba la mudui pyrshah ïa u, u la wad ban ïoh ïa ka licence be-aiñ, na ka bynta kawei ka dukan die kyiad (CL7) kaba don ha ka jaka shong briew, bad ka licence khaïi jong u ruh, ka dei kaba thok.
U la ong ba u DC ka Mandya Excise u Nagashayana u la shah weng hadien ba la mih ki jingkynnoh pyrshah ïa u.
“Nga la ïakren bad u Myntri Rangbah bad nga la wanrah shibun ki jingpynkylla.Kine baroh ki dei ki jinglamler ba la pynphriang pyrshah ïa nga”, u la ong bad bynrap ba un ym shim jaka rieh hapoh ka Dalit tag ruh.
Ha kajuh ka por, u Myntri ka tnad Food and Civil Supplies u KH Muniyappa u la ong ba kam don jingmut eiei ban pan ïa ka jingiehnoh kam jong u Timmapur mynta namar ba ka mukotduma ka long bad ka Lokayukta, bad u la ai jingmut ba ki lah ban leh kumta lada ka Lokayukta ka lap ba u Myntri u donkti.
U nongïalam ka liang pyrshah u R Ashoka u la kynnoh ba ka Timmapur ka la shukor bad pynkylla lynti ïa ka mat jong ka jingleh thok, hynrei ka BJP kan ym pdiang ïa ka jingïada jong u bad kan ïai bteng ban pynlong ïa ki jingïakhih tad haduh ba u Myntri Rangbah u Siddaramaiah un weng noh ïa u.
U Araga Jnanendra, u heh nongïalam jong ka seng BJP, u la dawa ïa ka jingtohkit jong ka kynhun SIT bad ki dkhot ka liang pyrshah, ki la pynlong ïa ka jingïakhih hapoh ka ïingdorbar.
