Patna, Rymphang:
Ki bor pahara ki la ai bainong lyngba ka jingïakhun kaba tyngeh jong ki pyrshah ïa ki kam pyntriem jong ki lehnoh ba la kyrshan da ka Pakistan, ha kaba ki la ïohlad ban siat ïap ïa u lehnoh ba pawnam jong ka kynhun Jaish-e-Mohammad (JeM) ha Kishtwar distrik jong ka Jammu & Kashmir.
U Adil, u dei u trai shnong jong ka Pakistan bad uba dei ka kti kamon jong u heh nongïalam jong ka kynhun Lashkar u Saifullah bad u la phet rieh na ka jingshah kem ha kine ki 18 bnai ba la leit.
U la don bynta ban leh ïa ki kam thombor ha kawei ka kper rep soh ha ka por ba u dang pynlong jaka rieh ha ki krem ki kroh ha kaba u la kynriah jaka pat ban leit rieh ha ki jaka lum ha Kishtwar.
Ha kaba khatduh u la shah pynïap ha ki kynhun pahara ha ka thaiñ Chhatroo ha ka por ba don ka Trashi 1.
Kane ka jingkhynra lang jong ki shipai, ki pulit ka Jammu & Kashmir, bad ki pulit jong ka Central Reserve (CRPF) ka la ïaid mynta la shi taïew eiei. Ha ka janmiet jong ka sngi Balang, haba pyntreikam katkum ki jingïoh jingtip ba kyrpang, ki bor pahara ki la ker kut ïa ka thaiñ Chhatroo, ha kaba kane ka la pynlong ïa u Adil ban don bynta ha ka jingïasiat bad ka kynhun jong ki shipai.
Wat la u la phet krad na ka jingshah kem kumba arphew sien, hynrei khatduh u Adil u la shah kerkut bad shah pynïap.
“Ha ki katto katne ki khep, u la lah ban phet krad na ki jingshah ker kut bad phet krad na ka jaka ba don ka jingïasiat. Hynrei, ha kane ka kynti, um shym la long uba donbok,” ong uwei u heh ophisar jong ki bor pahara.
Ka jingïap jong u Adil, ka la wanrah jingsuk ïa ki nongshong shnong, kiba ju ïakynduh ïa ka jingeh jong ka jingshah pyntieng pynsyier ha u ha katei ka thaiñ.
Ki bor pahara ki la pynjur ïa ka jingkhynra jong ki ban kem ruh ïa u paralok jong u Adil, u Saifullah, uba la phet krad naduh ba la pynïap ïa utei u lehnoh Jaish.
U nongïalam ka Jaish u Saifullah u dei ruh u nong Pakistan uba la wan rung tuh sha khappud kumba ar snem mynshwa. Naduh katei ka por u la treikam ha ki thaiñ Kishtwar bad Doda.
U Saifullah u la donkti ha ki katto katne ki kam thombor ïa ki bor pahara.
Ki heh sorkar ki ngeit ba u la pyrshang ban pynim biang ïa ki kynhun lehnoh ha ka thaiñ Jammu da kaba pynkylla jabieng ïa ki samla bad pynngop ïa ki sha ka “kolshor jong ki jingïasiat suloi.”
Ki bor pahara ki la ïoh jingtip ba u Saifullah u la phet krad sha ka liang Mihngi jong ka Chhatroo hadien ka jingshah pynïap jong u Adil.
Ym duna ïa ka lai tylli ki jingkhynra la sdang ban kem ïa u Saifullah, uba la trei shitom ha Kishtwar la katto katne por.
Ki bor pahara ki dang pynlong ïa ka jingwad bniah, da kaba pyndonkam da ki Drone bad ki ksew smadien ban lap ïa ki lehnoh kiba dang sah ha ki khlaw ba rben bad ki jaka ba jylliew jong katei ka thaiñ.
Ki jingïasiat kiba bun ki la jia ha kine ki bnai ba la dep, ha kaba katto katne ngut ki lehnoh ki la shah pynduh. Ka jingwad ïa kiba sah ka dangïaid shakhmat.
“Ngin sa ïai bteng ban pynkhih haduh ba u lehnoh ba khatduh un mih na ki lum jong ngi”, la ong uwei u heh ophisar jong ka kynhun pahara, da kaba pynpaw ïa ka jingkut jingmut ban pynduh jait ïa ka jingleh donbor na ki jaka ba jylliew jong ka Kishtwar.
Ka jingleit khynra lehnoh haduh mynta ka dang ïaid shakhmat.
