Vijayawada, ïaïong:
Ka tnad ka koit ka khiah jong ka sorkar pdeng ka la khot ïa ki jylla ban ïashim bynta shitrhem ha ka jingthmu jong ka ri ban pynduh jait ïa ki jingpang ba saphriang kiba kongsan kum ka HIV/AIDS, ka jingpang Tuberculosis, ñiangpyrsit bad Rubella haduh u snem 2030.
U Secretary jong ka tnat ka koit ka khiah jong ka sorkar pdeng u Punya Salila Srivastava u la ban jur ba ka sorkar pdeng ka trei shitom sha kane ka thong bad kyntu ïa ki sorkar jylla ban kyntiew ïa ka bynta jong ki ha ka jingïalap.
Ka la kren ïa kane hadien ka jingïalang bishar bniah bad ki heh ophisar ha ka tnad treikam jong ka Directorate of Medical and Health Services ha Mangalagiri ha ka janmiet jong ka sngi Palei, ha kaba ka la bishar ïa ka jingpyntreikam ïa ki skhim ai jingsumar ha AP.
U Srivatsava u la pynpaw ka jingsngewkhia ba ki jingpang bym saphriang ki nang kiew stet ban ïa kiba saphriang ha kylleng ka ri.
La kdew ïa ka jingkylla ka suiñbneng, ka jingbym lehkhuid ïalade, bad ka jingbym bret ïa ki jaboh jabaiñ kum ki daw ba kongsan kiba pynlong ïa ka jingkiew jong ki jingpang.
Ka la maham ba ka jingbym shimkhia ha ka jingpyndonkam ïa ki jaboh jabaiñ ka lah ban wanrah ïa ka jingkiew jong ki nongpang Malaria, katba ka jingphah khmih bniah ïa ka um man ka por ka long kaba donkam ban ïada na ka jingmih jong ka jingpang prie pynhiar bad kiwei kiwei ki jingpang kiba mih na ka um.
Ka la pynpaw ïa ka jingdonkam ban jurip ïa ki jaka buh snam, ban pynïar ïa ki jingshakri ban sumar ïa ka jingpang bampong bad ïa ki jingshakri ha ki Trauma bad ban lap ïa ka jingsaphriang jong ki jingpang khnang ban pynlah ïa ki kyndon ban ïada.
Shwa kane, u Myntri ka tnat ka koit ka khiah ka jylla u Saurabh Gaur u la batai lyngkot ïa ka halor ka jingpyntreikam ïa ki Flagship Scheme kum ka Sanjeevini, 108 bad 104 emergency services, bad ki buit thymmai ba la wanrah hapoh ka jingthmu Medic Challenge.
U Srivatsava u la ai jingmut ba ki jingpynmih thymmai ki dei ban pan jingmynjur na ka Indian Council of Medical Research (ICMR) ban pynthikna ïa ka jingpynshisha da ka saïan.
