Hyderabad, ïaïong:
Ki la don mynta haduh 42 ngut ki dkhot jong ka kynhun lehnoh CPI (Maoist) kiba la pyndem noh hakhmat u DGP ka Telangana u B Shivadhar Reddy ha ka janmiet jong ka sngi Thohdieng.
Napdeng kitei ki dkhot ki don u heh nongïalam jong ka People’s Liberation Guerrilla Army (PLGA) Battalion Commander bad u dkhot jong ka Dandakaranya Special Zonal Committee (DKSZC) u Sodi Malla ba la tip ruh da ka kyrteng kum u Keshal bad kum u Nikhil, u Chapa Narayana ba la tip ruh da ka kyrteng kum u Gajendar ba la tip ruh kum u Madhu, u Secretary ka SCM, JMMWP DVC bad u Kadthi Sannu ba la tip ruh da ka kyrteng kum u Manthu, DVCM, BKASR DVC. Kine ki la leit pyndem ha ryngkat 36 tylli ki tiar siat bad 800 grams ka ksiar.
Ka pisa baroh kaba lah ban ïoh ïa ka khusnam kaba long T.1.93 klur yn ai sha baroh 42 ngut ki dkhot kiba la aiti noh. Baroh ki Maoist kiba la wan pyndem wait hakhmat ki pulit ka Telangana ki long 761 ngut, haduh mynta u snem ki long 205 ngut, ha u snem 2025 ki long 509 ngut bad ha u snem 2024 ki long 47 ngut.
“Kane ka pyni ïa ka jingshaniah kaba nangroi ha ki polisi pynbha jong ka sorkar bad ka jingpynbor kaba bteng kaba la pynmih da ki bor pahara,” la pynshisha ki pulit.
