Vijayawada, ïaïong:
Ka jingpynbiang LPG ka la wanphai biang sha ka rukom kaba rim ha kylleng ka jylla kaba la pynsuk shibun ïa ki nongpyndonkam hapoh ka ri bad ki nongkhaïi hadien katto katne taïew jong ka jingthut namar ka jingïakynad ha West Asia.
Katkum ka jingkheiñ ba thikna, la pynpoi ha ka jylla ha kane ka sngi Saitjaiñ haduh 2,73,958 tylli ki Cylinder hapoh ïing bad 8,656 tylli ki Cylinder ki bym dei hapoh ïing. Ha kine ki 3 sngi ba la leit, la dep ban pynpoi 34,564 tylli ki Cylinder ha ki jaka kamai.
Ki jingkheiñ jingdiah jong ki kynhun ba dei khmih halor ka Gas ki pyni ruh ïa ka jinglong ryntih jong ka jingpynpoi LPG namar ba la buh 2,00,704 tylli ha ka sngi Saitjaiñ, 2,05,851 ha ka sngi Thohdieng, 2,39,842 ha ka sngi Balang bad 2,69,820 tylli ha ka sngi Ba-ar.
Da ka jingpyrshang jong u Myntri ka Civil Supplies u Nadendla Manohar, ki rukom pynpoi LPG ki la long kiba ryntih bad ka jingdon jong ka Gas shet ka la kiew bha ha baroh kawei ka jylla. Ka jingpynbna ban pyndap umphniang man ka sngi ka nang kiew sha ka 2 lak, kynthup ïa ki 10,000 haduh 15,000 tylli ki cylinder na ka bynta ban pyndonkam ha ki jaka kamai.
“Ka jingpynbiang LPG ka la wanphai biang sha ka jinglong kaba rim ha baroh kawei ka jylla khlem kano kano ka dak jong ka jingtieng” ong u N Bhaskara Reddy, State Level Coordinator for Oil Industry ha Andhra Pradesh.
Haba ïakren bad ka lad phah khubor, la ong, “Kumba 70% ka jingdawa na ka bynta ki Cylinder ba pyndonkam ha ki jaka khaïi la pynbiang mynta, katba la pynthikna ïa ka jingpynbiang kaba pura na ka bynta ki bynta kiba kongsan kum ki skul bad ki hospital.
Ki nongpyndonkam ïa ki Gas haïing bad ha ki jaka kamai ki la shah bthah ba ki dei ban leit mih sha ki nongsam na ka bynta ban ïoh ïa ka por ba biang ban pyndap biang ïa ki Cylinder jong ki,” u la ong.
Ka sorkar Jylla ka dang bishar bniah ïa ka jinglong jingman man ka por ban pynthikna ïa ka jingpynpoi LPG kaba khlem jingthut. Kam don jingduna LPG haduh mynta. La pynbeit ryntih ïa ka jingpynbiang bad buh hakhmat eh ha kano kano ka jaka ba donkam, la batai u State-level Coordinator na ka bynta ka Oil Industry.
Hynrei ka jingktah jong ka jingkiew dor jong ka LPG dang shen la sngew ba ka dang ïai bteng. Kumba ka long mynta, ka dor jong kawei ka tyndong LPG ba 14.2 kg ka long T.950, katba kawei ka tyndong LPG na ka bynta 19 kg ha ki lad kamai T.2,042.50 haduh T.2,200 ha ka jylla.
Ka jingkiew stet jong ka dor jong ka LPG ba die ha ka kam khaïi ka la pynkiew ïa ka jinglut jingsep ha ka jingtreikam jong ki hotel bad ki jaka bam, kaba la ktah ïa ka jingmih jong ki.
“Ka jinglong jingman jong ka jingpynpoi LPG ka la kham bha haba ïanujor bad ka taïew ba la dep. Ki Cylinder ba pyndonkam ha ki lad kamai mynta la ïoh da kaba shu kyrpad. Hynrei namar ka jingkiew dor, ngi dang mad katto katne ka jingktah”, la ong uwei u trai hotel jong ka Kanuru.
