New Delhi, ïaïong:
Ïa u Symbud Myntri Rangbah jong ka Bihar u Samrat Choudhary, la buh ba un sa long u Myntri Rangbah ba nyngkong jong ka seng Bharatiya Janata Party ha ka jylla hadien ba u la shahjied kum u nongïalam jong ka Legislature Party jong ka seng BJP ha ka sngi Ba-ar.
Ka seng BJP, ka seng ba marwei kaba heh tam ha ka ïingdorbar kaba 243 ngut bad kaba don 89 ngut ki MLA, ka la jied ïa u Choudhary kum u nongïalam jong ka seng ha ka kynhun thaw aiñ, tang hadien ba u Nitish Kumar, uba khlieh ïa ka seng JD(U) bad uba la long ruh u MP jong ka Rajya Sabha, ha ka taïew ba la dep, u la aiti ïa ka jingiehnoh kam jong u, ha u Lat ka jylla, u Syed Ata Hasnain, kum u Myntri Rangbah.
U Chouhan, u ba ka BJP Parliamentary Board ka la jied kum u nongpeit bad u nongkhmih bniah na ka bynta ka jingjied nongïalam jong ka seng thaw aiñ, u la ong ha ki nongthoh khubor, “u Samrat Chaudhary u la shah jied da kawei ka sur kum u nongïalam jong ka seng thaw aiñ jong ka BJP.”
U Choudhary, MLA ka BJP na Tarapur, un long u Myntri Rangbah ban wan jong ka Bihar, hadien ba u la shah jied kum u nongïalam ka seng thaw aiñ jong ka kynhun NDA. U dkhot jong ka BJP, u Upendra Kushwaha, ha ka jingthoh ha ka rynsan X, u la ai khublei ïa u Samrat Choudhary, u ba dei u Synbud Myntri Rangbah jong ka Bihar, na ka bynta ka “kitkhlieh kaba thymmai”.
Ha ka jingthoh kaba jrong hadien ba u la tyrwa ïa ka jingiehnohkam jong u, u Nitish Kumar u la jer kyrteng ïa ki kam ba la leh hapoh ka jingsynshar jong u bad u la pynpaw ruh ïa ka jingsngewnguh ïa u Myntri Rangbahduh ka ri u Narendra Modi.
U la ong ba ka sorkar NDA ka la leh shibun ki kam na ka bynta ki paidbah ka Bihar.
“Ngi la bteng ban shakri ïa ki paidbah jong ka Bihar. Ka sorkar thymmai kan ïoh ïa ka jingïatreilang bad jingïalam ba pura jong nga. Wat shakhmat ruh, bun ki kam kiba bha bha kin sa long, bad ka Bihar kan sa kiew shibun. Nga ai khublei naduh ka dohnud ïa baroh bad nga ai ka jingkyrkhu kyrdoh jong nga,” u la bynrap.
