Kolkata, ïaïong:
Ka Election Commission of India (ECI) ka la ithuh ïa ka Murshidabad kaba bun ki jaitbynriew rit paid kum ka jaka kaba kham sngewkhia napdeng ki district ha West Bengal ki ban leit thep vote ha ka bynta ba nyngkong jong ka elekshon sha ka ïingdorbar thawaiñ ka jylla ha ka 23 tarik, Ïaïong, bad kumta ka la rai ban buh bad pyntreikam ïa ki shipai ba bun ha kane ka jaka.
Ki briew kiba don hapoh jong ka ophis jong u Chief Electoral Officer (CEO) ki la ïathuh ba na ki 2,407 tylli ki kynhun jong ki bor pahara ban pyntreikam ha ka jingthep vote kaba nyngkong, haduh 316 tylli ki kynhun (13 percent) yn pyntreikam tang ha Murshidabad distrik.
Ka Murshidabad, kum ka distrik ba pynïaid ïa ka jingsynshar, ka don ar tylli ki jaka treikam jong ki pulit, kata ka Murshidabad Police District bad ka Jangipur Police District.
Na ki 316 tylli ki kynhun ban pyntrei ha ka Administrative District jong ka Murshidabad, 240 tylli kin dei na ka bynta ka Murshidabad Police District, bad sa 76 tylli kin long na ka bynta ki pulit jong ka Jangipur.
“Ka jaka ba la hap hapoh ka Murshidabad Police District ka kham heh shibun ban ïa ka Jangipur Police District, ha kaba ka jingdon jong ki jaka ba sngewkhia kiba lah ban jia ki jingjia basngewsih ka kham bun, bad kumta ka jingpynbna ïa ki bor kan kham bun hangta”, la batai u nongthoh khubor.
Ka ECI mynta ka kynti ka la rai ba, nalor ki pulit ka Central Armed Police Forces (CAPF), ki pulit na ka India Reserve Battalion (IRB) bad ki Armed Police Wing na kiwei pat ki jylla yn pyntreikam na ka bynta ka jingthep vote jong ka bynta kaba ar ha kane ka jylla, nalor ki pulit jong ka West Bengal, kane kan pynshngaiñ shibun ïa ki nongthep vote.
