Srinagar, ïaïong:
Ha ka sienjam kaba la pynmih ïa ka jingïatainia ha ka saiñpyrthei, u Myntri Rangbah ka Jammu & Kashmir, u Omar Abdullah, ha ka sngi Balang, u la kyntait ban ot ïa u ribon, kaba don ïa ki rong jong ka lama lai rong jong ka India, ha ka jingïalang ha Srinagar.
U Omar, u la thmu ban plie ïa ka jingïalang ‘Know Your Artisants’, kaba thmu ban kyntiew ïa ki kam shna tiar jong ka thaiñ, ha Kashmir Haat ha Srinagar.
Hadien ba u la poi ha katei ka jaka, u Omar u la ïohi ba u ribon jong ka jingrakhe ka don ïa ki rong jong ka lama ka ri.U la kyntait ban ot ïa u ribon bad ha ka jaka kata u la kyrpad ïa ki nongpynïaid ban pyllait ïa u na u jingteh.
U Myntri Rangbah ka Jylla ula ïarap ruh ban pyllait bad sop ïa u ribon shwa ban aiti biang sha ki nongpynïaid ryngkat bad ki jingbthah ba dei ban buh da ka jingburom. Ka CCTV kaba la ring dur ïa katei ka jingjia kaba pyni ba u Omar u la kyntait ban ot ïa u ribon ka la paw bha naduh katei ka por ha ki Social Media.
Ym pat lah ban tip la yn leh eiei ne em pyrshah ïa ki nongpynïaid halor ka jingpyndonkam ïa u ribon. Ha kajuh ka por, u nongaiktien ka BJP ha J&K, u Altaf Thakur, u la khot ïa kane ka jingjia “kaba long kaba jylliew bha bad kaba ym lah ban pdiang”.
“Ka Tiranga ka dei ka dak jong ka jingsarong jong ka India, ka jingïatylli, bad ka jingaiti jong ki martyr bym lah kheiñ bad ym dei satia ban pynduna ïa ka sha ka jingleh tamasa. Ka jingpyndonkam ïa ka lama ka ri kum u ribon ban ot ha ka por ba pynskhem ka pynpaw ïa ka jingbym sngewthuh bad burom ïa ka jinglong kyntang jong ka,” u la ong.
Hynrei u la ai khublei ïa u Myntri Rangbah ka jylla uba la kyntait ban ot ïa u ribon, da kaba ong ba katei ka rai ka pynskhem ïa ka burom jong ka lama ri.
“Ka jingkyntait jong u Myntri Rangbah ka phah ïa ka khubor kaba khlaiñ ba ki dak jong ka ri ki long halor ki kyndon ba la buh bad ki rukom jingleh jingkam. Ka pynpaw ïa ka jingsngew kitkhlieh bad jingburom kaba jylliew ïa ka lama ka ri,” u la bynrap.
U Thakur u la dawa ban weng kam mardor bad ban leh da kaba tyngeh ïa kiba donkti.
“Kane kam dei ka jingleh bymsuidñiew kaba rit hynrei ka dei ka jingleh bymsuidñiew kaba khraw. Dei ban ithuh bad pynsangeh khlem da pynslem ïa ki ophisar kiba la ailad ne shna ïa kum kane ka kam. Ka jingpynshitom kaba long ka nuksa ka long kaba donkam ban pynthikna ba kum kine ki jingjia kin ym jia biang”, u la ong, katba u dawa ruh ban kem mardor ïa u heh ophisar ba donkti.
U Thakur u la ong ba ka jingburom ïa ka lama ka ri ka dei ka kamram kaba kongsan, khamtam ïa kito kiba shakri paidbah, bad u la khot ïa ka bor synshar ban pynbeit ïa ka jingkitkhlieh bad ban pynmih ïa ki kyndon kiba shai ban ïada na kano kano ka jingpyndonkam bakla ïa ki dak ki shin jong ka ri ha ki por ban wan.
