New Delhi, ïaïong:
Ka sorkar ha ka sngi Palei ka la ong ba ka jingpynpoi LPG sha ki longïing ka dang ïai bteng khlem jingthut, wat haba ki jinglong jingman ha ka pyrthei ki ktah ïa ka jingpynpoi mar.
Katkum ka jingkheiñ jong ka tnad Petroleum and Natural Gas, ka jingpynrung online ïa ka LPG ka la kiew sha ka 98 percent, bad ym shym la don kano kano ka jingduna ha ki jaka sam Gas. Ka tnad ka la ong, “Ka jingpynpoi LPG sha ki longïing ka dang long kumjuh… bad ym shym la don kano kano ka jingduna.”
Ka la bynrap ruh ba la pynthikna ban pynbiang 100 percent na ka bynta ka LPG ba pyndonkam hapoh ka ri, ka pipe natural gas (PNG), bad ka CNG na ka bynta ki kali.
Ki heh sorkar ki la ong ba ka jingpyndonkam ïa ki Delivery Authentication Codes (DAC) ka la pynbha ïa ka jingkhuid jingsuba ha ka jingsam marbam. Mynta, kumba 92 percent na ki jingpynpoi ki dang pyndep da kaba pyndonkam ïa ka jingpynshisha da ka DAC, kaba ïarap ban ïada na ka jingpynkylla ïa ki Cylinder ha ka jingdon jong ki nongsam.
La pynshlur ruh ïa ki nongthied ban pyndonkam ïa ki jaka Booking Digital ha ka jaka ban leit jngoh ïa ki nongsam. La ai jingmut ïa ki jylla ban pynsted ïa ka jingpynbiang ïa ki jingpynïasoh PNG bathymmai sha baroh ar ki longïing bad ki nongpyndonkam ba kamai.
Nalor kata, ka jingpynbiang ïa ki tyndong LPG kiba heh 5 kg na ka bynta ki nongbylla sngi ka la kiew ar shah haba ïanujor bad ki kyrdan ba sdang jong u bnai Lber.
Naduh ka 23 tarik u Lber, la die kumba 15.5 lak tylli ki Cylinder kiba rit.
Ka jingdawa LPG na ka bynta ka kam khaïi ka dang khlaiñ, ha kaba la die palat 1.42 lak metrik ton naduh ka 14 tarik u Lber.
Ka jingpyndonkam ïa ka LPG jong ki kali ruh ka la kiew, ha kaba ki kompeni paidbah ki la ïoh ïa ka jingkiew kaba 62 percent ha ka jingdie. Ka jingkiew kaba khraw tam la ïohi ha ki jylla kum ka Karnataka, Tamil Nadu, Telangana, Rajasthan, bad West Bengal.
Ban ïada na ka jingdie mar bad ka jinglum jingtip, ki bor synshar ki la pynjur ïa ka jingpyntreikam ha kylleng ka ri. Kine ki sienjam ki long ban pynthikna ïa ka jingsam kaba hok bad ban ïada na ka jingpyndonkam bakla.
Ka tnad ka la ai jingmut ïa ki nongshong shnong ba kim dei ban tieng ne pyllang umphniang lypa. Ka la ong, “La kyntu ïa ki nongshong shnong ban kiar na kaba sheptieng ban thied ïa ka umphniang, diesel, bad LPG namar ba ka sorkar ka dang pyrshang katba lah ban pynthikna ïa ka jingdon jong ka umphniang, diesel bad LPG. To husiar na ki khubor lamler bad shaniah ha ki tyllong khubor ba thikna,” la ïathuh ka tnad pathai khubor.
La pynshlur ruh ïa ki briew ban pyndonkam da kiwei pat ki lad pynmih umphniang kum ka PNG, ka bording ilektrik, ka umphniang sharak, bad u dewïong ban pynduna ïa ka jingeh ban ïoh ïa ki LPG katkum ka jingdonkam.
La pynrung ïa kiwei pat ki lad ki lynti, kynthup ïa ka jingpynkiew ïa ka jingmih jong ka karkhana pynkhuid umphniang bad ka jingpynbna kaba kham jlan, ban pynïaid ïa ka jingpynbiang ha ka rukom kaba biang.
