Mumbai, ïaïong:
Ki la don kumba 1,200 ngut ki samla kiba la ïoh ïa ka jingtyrwa kam ha ka jingïalang ba kyrpang ba la pynlong da ki pulit ka Gadchiroli ha Maharashtra hapoh ka ‘Project Udaan’ ha ka 16 tarik, Ïaïong, 2026, la ïathuh ki heh sorkar.
Ki la ong ba ka jingthmu ka long ban ai kam ai jam ïa ki samla ha ki jaka ba kham jngai jong ka Gadchiroli kaba shisien ka la shah ktah ha ki kam pyntriem jong ki lehnoh Maoist.
Ïa kane ka jingïalang la pynlong ha Shaheed Pandu Alam Hall kaba don ha ophis treikam jong ki pulit bad la thmu ban kyrshan ïa ki samla shynrang bad kynthei kiba la nang la stad na ki thaiñ nongkyndong bad ki thaiñ riewlum, ong ka kyrwoh khubor ha ka sngi Palei.
“Baroh ki don 1,278 ngut ki kyrtong kiba la ïoh ïa ka jingtyrwa kam na ki 38 tylli ki kompeni ba pawnam. Kine ki kynthup ïa ki kompeni kum ka Mahindra & Mahindra, Tata Motors, Flipkart bad ka DMart. Ïa ki kyrtong kiba la shah jied la tyrwa ïa ka tulop shisnem kaba sdang naduh T.1.8 lak haduh T.3.6 lak,” la ong ka khubor.
Shuh shuh la ïathuh ba ki la don kumba 4,000 ngut ki samla bym don kam don jam ki la shah pynrung kyrteng na ka bynta kane ka jingïalang, na kine kumba 2,400 ngut ki la wan hi dalade sha kane ka jingïalang. Bun ki nongïashim bynta ki wan na ki jaka ba jngai bad kiba eh ban leit, la ong ka kyrwoh.
Kane ka jingthmu ba kyrpang ka long ban pynïasoh ïa ki nongwad kam bad ki nongpyntreikam bad ban kyntiew ïa ka lad ïoh kam ha kane ka thaiñ, la ïathuh ki heh sorkar.
Ïa ki shithi thung kam la sam da u Ashish Jaiswal, u Minister of State and Guardian Minister jong ka Gadchiroli distrik, la ong shuh shuh ka jingthoh.
U la pynshlur ïa ki briew kiba la shah jied ban trei hok bad pyndonkam hok ïa ki lad ki lynti ba la ai, katba u la kyntu ruh ïa ki ban pynkhreh ïalade na ka bynta ka lawei kaba don ka jingïakhun.
Ki heh sorkar ki la ong ba kum kine ki jingthmu ki dei shi bynta jong ki jingpyrshang kiba dang ïaid shakhmat ban kyntiew ïa ka roi ka par ha Gadchiroli, ha kaba ka jingktah jong ki kam lehnoh ka la nang duna bha ha kine ki snem ba la dep.
Lyngba ki prokram bapher bapher kiba ai kam bad kiba pynshong nongrim ha ka jingtbit, ki pulit ki la dep ban ïarap ïa ki hajar ngut ki samla ban ïoh kam ha ki bynta kum ka koit ka khiah, ka jingshakri, ki kali bad ki jingshakri ba long katkum ka buit stad kaba mynta.
Ha kajuh ka por, ha katei ka sngi, la aiti haduh 31 tylli ki kali saw shaka kiba thymmai sha ki heh pulit ha Gadchiroli na ka bynta ban pahara bad ban leh ïa ki kam pyrshah Maoist ha katei ka distrik. Kine ki kynthup ïa lai tylli ki Surveillance Van kiba mynta kiba thmu ban pynkhlaiñ ïa ka jingpahara bad jingpeitngor ha ka distrik.
Ha kane ka sngi laleit ban ïashim bynta da ki katto katne ngut ki heh ophisar, kiba kynthup ïa u Milind Narote, u Avishyanth Panda bad u Nilotpal, ha ryngkat kiwei pat ki ophisar jong ka tnad synshar bad ki heh pulit.
