Kine ki sngi ki long ki sngi ka jingkylla ha kiba bun ki liang la ha ka synshar khadar ne ha ka imlang ka sahlang ruh. Kumta ka la dei ka por ban pynkylla ïa ka rukom kaba ngi ju bud baroh shi katta.
Dei ban pynkylla ïa ka rukom jied ïa u Rangbah Shnong kum u khlieh nongsynshar shnong da kaba jied beit da ka jingïathep vote ne kata ka Sacret Ballot ban lait ka bishni ka pihuiñ para shnong para thaw ne peit matdong hapoh shnong. Ban lait ruh ka jingleh donbor kum ka jingthung Acting Rangbah shnong khlem ai lad ban jied ïa u Rangbah shnong da ki nognshong shnong lyngba ka Dorbar shnong.
Namar ka kam pynïaid shnong pynïaid thaw mynta kam pynsngewhun ïa ki paidbah nongshong shnong namar la shu jied bad thung Rangbah shnong da ka lynti ka bym beit ym katkum ka rukom pynïaid shnong pynïaid thaw kaba la ju leh barabor. Dei tang ka elekshon lyngba ka Sacret Ballot kaba lah ban solve bad tehlakam ïa ka jingsngewniam, sngewpher jait bad kiwei kiwei kan duh noh lyngba kane ka rukom synshar paidbah ne kata ka Democracy system kaba mynta lyngba ka Sacret Ballot. Ka la dei ka por ban pynbeit ïa kano kano ka rukom bat dustur / riti ka bym bha. Dei ban wanrah da ka aiñ ne ka rukom kaba beit ba ryntih na ka bynta ka bha ka miat ki nongshong shnong khlem ka jingïashah liang.
C. B. Iawphniaw
