Kolkata, ïaïong:
U kapten barim jong ka kynhun ïalehkai kriket ka India, u Mohammad Azharuddin, u la don bynta ha ka jingïalap elekshon ban kyrshan ïa u kyrtong ka seng Congress, u Adhir Ranjan Chowdhury ha Baharampur Assembly konstitwensi ha Murshidabad jong ka West Bengal.
Hashwa ka jingpyni paidbah, u Azharuddin u la pynkynmaw ïa ka jingshemphang kaba khraw jong u Chowdhury ha ka saiñ pyrthei bad ka jingïadei bad kane ka thaiñ.
Ki briew ki la ïalum lang ha baroh arliang surok bad ki la ïeng ha ki baranda, da kaba kner ïa la ki kti sha u Mohammad Azharuddin.
U Chowdhury, uba dei u MP barim jong ka Baharampur la san sien, u ïakhun mynta ha ka elekshon sha ka ïing dorbar thawaiñ jong ka West Bengal ha u snem 2026, kum u kyrtong ka Congress, kaba pyni ïa ka jingwanphai biang jongu sha ka saiñ pyrthei elekshon jong ka Jylla, hadien jan lai phew snem.
Ka Baharampur konstitwensi kan leit thep vote ha ka 23 tarik u Ïaïong, ka sngi ba ka bynta ba nyngkong kan long ka jingthep vote. Ka jingthep vote kaba ar kan long ha ka 29 tarik, Ïaïong bad ka jingñiew vote kan long ha ka 4 tarik u Jymmang.
U Chowdhury, u don ha ka jingïakhun elekshon sha ka ïingdorbar thawaiñ, hadien ba u la shah rem ha ka elekshon Lok Sabbha ha u snem 2024, na Baharampur, ha u Yusuf Pathan jong ka TMC, uba dei ruh u nongïalehkai kriket barim. Ka jingwan jngoh jong u Azharuddin sha Baharampur, la ïohi kum shi bynta jong ka jingpyrshang jong ka Congress ban pynrung ïa ka bor ha ka jingïalap elekshon jong u Chowdhury.
Wat hapdeng ka jingshah pynphaidien ha u snem 2024, u Chowdhury u dang long u riew pawkhmat ha ka saiñ pyrthei ha Murshidabad, ha kaba u la mihkhmat ïa ka shuki jong ka Baharampur ha Parliament naduh u snem 1999 bad kham mynshwa u la shakri kum u Myntri ka sorkar pdeng bad kum u heh jong ka West Bengal Congress.
