Amaravati, ïaïong:
U Myntri Rangbah ka Andhra Pradesh u N Chandrababu Naidu u la ong ba ka seng Congress kaba khanglad ïa ka Women’s Reservation Bill ka la kyntait ïa ka India kum ka ‘sienjam kaba don ha ka histori ban pynkupbor ïa ki kynthei’.
Ka aiñ pynkylla ïa ka Riti synshar ka ri ban pyntreikam ïa ka jingbuh kyrpang ïa ki kynthei ha ki ïingdorbar thaw aiñ ha u snem 2029 bad ban pynbun ïa ki seat jong ka Lok Sabha ka la shah rem noh ha ka sngi Thohdieng ha ka ïingdorbar ba hapoh.
Kane ka bill ka thmu ban ai 33 percent ka jingbuh kyrpang ïa ki kynthei ha Lok Sabha bad ha ïingdorbar thawaiñ ha jylla. Katba 298 ngut ki dkhot ki la kyrshan ïa kane ka Bill, 230 ngut ki MP ki pyrshah ïa ka.
Na ki 528 ngut ki dkhot kiba la thep vote, kane ka bill ka donkam 352 vote na ka bynta ka jingbun paid kaba ar bynta na ka lai bynta.
“Da kaba khanglad ïa ka Women’s Reservation Bill, ka liangpyrshah ba la ïalam da ka Congress ka la kyntait ïa ka India ban shim ïa ka sienjam kaba don ha ka histori ban pynkup bor ïa ki kynthei,” la ong u Naidu ha ka Social Media ha ka sngi Thohdieng.
Ka seng ba la ïatreilang jong ka sorkar NDA ha ka sorkar pdeng, u Naidu u la shem ba kam dei tang ka jingkhanglad ha ka saiñpyrthei hynrei ‘ka jingshet kylla ïa ki million ngut ki kynthei’ kiba dei hok ban ïoh ïa ka sur kaba ïaryngkat bad ka jingïadon hok ha ka Parliament. “Ka jaitbynriew kan kynmaw,” la bynrap biang u Naidu.
Ha kajuh ka por, u nongseng jong ka Janasena bad u Symbud Myntri Rangbah ka Jylla u Pawan Kalyan u la ong ba ka kabu kaba khraw ban kyntiew ïa ka bor jong ki kynthei ha ki bor thaw aiñ la pynduh noh da ki seng ka liang pyrshah.
“Lada ki seng pyrshah ki la mynjur ïa ka aiñ ban buh jaka ïa ki kynthei, te ki (kynthei) kin jin da la ïoh ïa ka jingburom,” la ong u khlur ak phlim bad u riewsaiñ pyrthei ha ka jingïakren bad ki nongthoh khubor.
