Chennai, ïaïong:
U nongïalam jong ka seng Congress u Rahul Gandhi, u la kynthoh jur ïa ka seng AIADMK kaba la ïalam ïa ka kynhun NDA ha ka por ba u ai jingkren ïalap elekshon, hajan Sholinghur jong ka Ranipet District, ha ka janmiet jong ka sngi Saitjaiñ.
“Ka AIADMK kam long shuh kumba ka long mynshwa. Ka la don lut hapoh ka jingsynshar jong ka BJP,” la kynnoh u Gandhi, da kaba kynnoh ba ka seng riewlum ka “pyndonkam ïa ka seng Dravidian ban rung sha Tamil Nadu.”
“Ngi ka Indian National Congress ngi ngeit ba ka Tamil Nadu ka dei ban synshar da ki Tamil, ym dei ban synshar ïa ka Tamil Nadu da kaba leh thok na Delhi”, u la ong.
Haba ïadei bad ka jingïatreilang jong ka Congress bad ka DMK, u Gandhi u la bynrap, “Ngi la ïatreilang bad ka DMK, hynrei ngim ju thombor satia ïa ki, ban byrngem ïa ki, lane ban pyndonkam ïa ka Enforcement Directorate halor jong ki. Ka BJP ka thombor bad byrngem ïa ki nongïalam ka AIADMK.”
U la pynskhem ruh ba ka Rashtriya Swayamsevak Sangh (RSS) bad ka BJP “kin ym lah satia ban synshar ïa ka Tamil Nadu.”
U nongïalam ka Liang Pyrshah ha ka Lok Sabha u la kdew ruh ïa ka jingshah rem jong ka aiñ pynkylla Riti synshar kaba ïadei bad ka jingpynbeit pud, da kaba ong “Hynnin ka sngi, ngi la pynsangeh ïa ka jingpyrshang jong ka BJP ban pynduna ïa ka jingïadon bynta jong ki jylla ba Shathie.”
Katei ka bill, ka la duna bha ïa ka jingbun paid kaba donkam, kaba ar bynta na ka lai bynta ha Lok Sabha, ha kaba ka la ïoh 298 ngut ki vote kiba kyrshan bad 230ngut kiba pyrshah, kaba dei ka sien kaba nyngkong ha ki 12 snem, ba ka ain pynkylla Riti synshar jong ka sorkar Modi, ka la shah rem.
