Ranchi, ïaïong:
U Special DG jong ka tnat pulit CRPF, u Deepak Kumar, u la pynmih ïa ka jingpynbna kaba tyngeh ïa u nongïalam ba hakhliehduh jong ka kynhun lehnoh Maoist, u Misir Besra bad ki para dkhot jong u, da kaba kyrpad ïa ki, ba kin aiti noh bad ban wanphai biang sha ka jingim babha hapoh shibnai lym kumta kin ïakynduh ïa ka jingshah pynshitom kaba tyngeh.
Hapdeng ka jingïaleh pyrshah Naxal kaba dang ïaid shakhmat ha ki khlaw ba rben bad bym lah ban poi sha ka Saranda ha West Singhbhum, u DG ba kyrpang jong ka CRPF u Deepak Kumar u la leit jngoh ïa ka ktem pahara ha ka shnong Baliba, ha kaba u la ïakynduh bad ki shipai bad ai mynsiem ïa ki.
Hadien ba u la pynlut haduh ar kynta ha katei ka jaka sah, u Kumar u la pynlong ïa ka jingïalang bad ki heh sorkar bad u la thaw ïa ka buit ban pynjur ïa ki rukom pyntreikam ban wanrah ha ki sngi ban wan.
U Special CRPF DG u la sngap ruh ïa ka jingud jingnam jong ki bor pahara.Haba ïakren bad ki lad pathai khubor, u Special DG u la pyntip ba ka West Singhbhum ka dang sah tang ka distrik ha baroh kawei ka Ri kaba dang shah ktah ha ki Maoist.
U la pynshai ba ka jingkhynra kaba dang ïaid shakhmat ha Saranda ka dei kaba thmu kyrpang ïa u nongïalam Maoist u Misir Besra bad ka kynhun jong u. “Ki shipai ki la buh por shibnai, ha kaba yn kem ne pynduh pyndam ïa u Besra, watla ka jingaiti noh ka dang long ka lad kaba u la dei ban jied,” ong u Special CRPF DG.
U la mynjur ruh ïa ka bynta kaba bud jong ka jinghiar thma, da kaba pynksan ba ki bor pahara kin pynneh ïa ka jingpynbor kaba khlem sangeh haduh ban da pynurlong ïa ka jingthmu.
U DG ba kyrpang jong ka CRPF u la bthah ruh ïa ki shipai ban pynduh noh ïa ka jingktah jong ki Maoist na Saranda hapoh ka por ba la buh, kaba pyni ïa ka jingkiew kaba jur ha ki jingtreikam ha kylleng ka jaka khlaw barben.
Kaba kham pawnam ka long ba kane ka dei ka sien kaba nyngkong ba ki bor pahara ki la buh shai ïa ka por ba la buh shibnai pyrshah ïa u nongïalam ba hakhliehduh jong ka kynhun lehnoh Maoist.
Kane ka pyni ba ka jingtreikam ka la ïaid shabar jong ka jingpynkhreh kaba man ka sngi bad mynta ka ïaid ha ka rukom kaba la thmu pura, ha kaba ka jingpyrkhat jong ki bor ka long ban pynduh ïa ka jinglong nongïalam.
La ngeit ba mynta ki don kumba 45-50 ngut ki Maoist kiba dang bteng ïa ka kam ha ka kynhun ha ka thaiñ Saranda, ha kaba ki kynhun pahara ki dang pynjur ïa ka jingleit khyna lehnoh.
Katkum ka khubor na ki pulit, ki bor pahara ki la ker kut ïa ki Maoist hapoh ka jingjngai kaba 10 kilomitar ha ki khlaw Saranda.
La ngeit ba u nongïalam bahakhliehduh jong ka seng Maoist, u Misir Besra, uba dei u dkhot jong ka Politburo, uba la shah thong ruh ha ka khlieh jong u da T. 1klur, u la shah set kut hapoh jong ka.
Haba kylli halor kano kano ka sienjam ba la shim da u Misir Besra ne ki nongbud jong u na ka bynta ka jingleit pyndem wait jong ki, u Deepak Kumar u la pynshai ba kam shym la don kano kano ka sienjam na ki Maoist haduh mynta ha kaba ïadei bad kane ka bynta.
U la kyntait ruh ïa ki khubor ba u khun jong u Misir Besra u leit jngoh ïa ka Saranda, da kaba ong ba kam don kum kata ka jingtip.
“Da ka jingbym don kano kano ka jingkynthoh kaba bha na ki Maoist haduh mynta, ki bor pahara ki la pynjur ïa ka jingtreikam da kaba kham jur,” ong u Deepak Kumar.
Ka jingwad kan nang jur shuh shuh ha ki sngi ban wan, da kaba ki bor pahara kin leit khynra sha ki jaka ba long khlaw, u la bynrap.
Ïa kane ka jingkhynra la ïohi kum ka jingkiew kaba khraw ha ka jingïaleh pyrshah Maoist kaba dang ïaid shakhmat ha Jharkhand, khamtam ha ka thaiñ Saranda, kaba dei ka jaka ba la slem bha jong ka Left-Wing Extremism.
Ka jingthmu jong ka sorkar ka long ban pynduh pyndam noh ïa ki lehnoh naduh u bnai ba la lah, hynrei naba ka jingbym patiaw la aipor bad buh jingmaham pyrshah ïa ki Maoist kiba dang sah.
Khnang ban khanglad ïa ki pulit ban poi sha ki jaka ba la ker kut, la buh ïa ka network kaba khlaiñ bha ha ki jaka thliew bad ki bom IED sawdong jong ka.
Wat la ki Maoist ki la buh ïa ki bom IED ha ka thaiñ baroh kawei, hynrei ki shipai ki ïaid shaphrang suki suki sha ki khlaw da ka jingkut jingmut kaba pura bad ki la buh katto katne ki jaka pahara ba shipor ha ki jaka ba kongsan jong ki.
