Chennai, ïaïong:
Ka Supreme Court ha ka lah sngi U Blei ka la ong ba kan pan ïa ka kaiphod na u Chief Justice jong ka Calcutta High Court halor ka jingtreikam jong ki Appeal Tribunal ba la buh ban bishar ïa ki jingïakynad halor ka thup nongthep vote kiba mih na ka jingpyntreikam ïa ka Special Intensive Revision (SIR) ha West Bengal kaba la jan ban pynlong ïa ka jingthep vote.
Ïa kane ka mat la kdew hakhmat ka kynhun nongbishar jong u Chief Justice of India (CJI) u Surya Kant bad ka Justice Joymalya Bagchi da u nongïasaid aiñ ba rangbah u Devdatt Kamat.
U Kamat u la pynpaw ba ki Appellate Tribunal, kiba la thaw katkum ki jingbthah jong ka ïingbishar bahakhliehduh, kim treikam bha bad la kynnoh ba kim kohnguh ïa ki hukum jong ka ïingbishar bahakhliehduh.
U Kamat u la kynthoh ba ki bor ba ujor ki pdiang tang ïa ki aplikeshon ba la pynshong nongrim ha ka Internet bad kim shah ïa ka jingïasaid aiñ, da kaba pynduh ïa ki briew shimet ïa ka lad kaba biang ban bud ïa ki jingujor jong ki.
“Ki Appellate Tribunal kim treikam satia. La shim tang da ki aplikeshon kiba pyndonkam da ki kor Computer bad Internet. Ym shah ban mihkhmat.Ym shym la bud ïa ki hukum jong kane ka ïingbishar”, la pynshisha une u heh nongïasaid aiñ.
Da kaba shim khia ïa kane ka jingujor, u CJI Kant u la ïohi ba la ju kdew biang ïa ki mat kiba kum kita bad u la pyni ba ka ïingbishar bahakhliehduh kan khot ïa ka jubab na u Chief Justice jong ka Calcutta High Court.
“Katto katne ne kawei pat ka jingkdew thymmai ha kaba ïadei bad kine baroh. To ngin shim ïa ka kaiphod na u Chief Justice jong ka High Court mynta ka sngi hi,” la ong ka kynhun nongbishar ba la ïalam da u CJI Kant.
Ka jingpynroi ka shim ïa ka jingmut ha kaba ïadei bad ki hukum bakham hashwa jong ka ïingbishar bahakhliehduh kiba bthah ban thaw ïa ka rukom kyrpad kaba laitluid ban bishar ïa ki jingïakynad kiba ïadei bad ka jingpynrung bad jingpynkylla na ki thup nongthep vote ha ka por ba pyntreikam ïa ka SIR.
Ha u bnai Lber, ka ïingbishar bahakhliehduh ka la bthah ban thaw ïa ki Appellate Tribunals kiba kynthup ïa ki Chief Justice jong ka High Court bad ki nongbishar barim, ban pynthikna ïa ka jaka ba laitluid ban bishar ïa ki jingïakynad halor ka thup nongthep vote.
Ka la ai bor ïa u Chief Justice jong ka Calcutta High Court ban ai jingmut ïa ki kyrteng na ka bynta kum kine ki ïingbishar, ha kaba ka Election Commission of India (ECI) ka la ai kam ban pynmih ïa ki jingpynbna ba pura bad ban kit ïa ki jinglut kiba ïadei bad kane.
Hadien kata, ha ka hukum ba la pynmih ha kaba sdang jong une u bnai, ka ïingbishar bahakhliehduh ka la pynshai ba ki briew kiba la weng noh na ka thup nongthep vote ba la pynkylla kin ïoh ïa ka hok ban thep vote tang lada ïa ki jingujor jong ki la shah da ki ïingbishar ba la buh hapoh ki por ba la buh.
Ka la buh jingthoh ruh ba la thaw bun tylli ki Tribunal bad ki dang treikam katkum ka rukom treikam ba la buh da ka komiti jong ki nongbishar barim.
