Bhopal, ïaïong:
Katkum ka jingïathuh jong ki pulit, la ong ba palat T.15 klur ka ksiar bad ka pisa la shah lute na kawei ka tnad jong ka Bank of Maharashtra kaba don ha ka thaiñ Baidhan jong ka Singrauli distrik. Ha kaba ïadei bad kane ka jingjia, ki la don arngut ki runar kiba la shahkem, katba ka jingthwet ka dang ïaid shakhmat ban lap ïa ki suba donkti kiba dang sah.
Katkum ka jingïathuh jong ki heh sorkar, la ong ba kane ka kam lute ka la jia ha ka janmiet jong ka sngi Thohdieng haba san ngut ki briew kiba la kah durkhmat ki la rung shapoh katei ka bank bad phet krad ryngkat bad ka ksiar kaba 10 kilo bad kumba T. 35 lak ka pisa.
Katkum ka jingïathuh ka tyllong khubor, la ong ba ka dor jong ki tiar ba la shah tuh kumba la kheiñ ka la long T. 15.35 klur. Kane ka jingjia ka la pynmih ïa ka jingsyier ha Singrauli bad ka la khring ïa ka jingmut jingpyrkhat jong baroh ha ka jylla.
U heh pulit jong ka Singrauli, u Manish Khatri, u la ong ba la phah ïa ki kynhun pulit ha kylleng ki jylla ban wad ïa ki briew kiba la shah kynnoh donkti ha ka jingjia kiba dang sah bad kiba dang phet rieh na ki kti jong ka aiñ.
“Ngi la lah ban ïoh ïa ka jingpynbna kaba nyngkong haduh mynta. La pyntreikam ïa ki kynhun pulit ha kylleng ki jylla bapher bapher.Ngin sa ai ïa ki jingtip ba kham bniah tang shu mih ki jingtip kiba thymmai”, u la ong.
Na ka liang jong ki pulit ki la thaw ïa ki 10 tylli ki kynhun ba kyrpang hapoh ka jingpynïaid jong u Special Director General ka Rewa Zone u Anil Kumar bad u IG Gaurav Rajput ban tohkit ïa kane ka kam bad ban thwet ïa ki runar kiba donkti.
Uwei u briew uba shah kynnoh donkti ha kane ka jingjia, u la shahkem da ka jingïarap jong ki pulit ka tnat Railway jong ka Bihar, katba ïa uwei pat la kem na Bihar, la ïathuh ki heh pulit.
Ha kajuh ka por, ka Myntri jong ka jylla ka Sampatiya Uikey ka la leit jngoh ïa ka ophis treikam jong ka district ha ka step sngi Saitjain bad ka la bishar bniah ïa ka jinglong jingman bad ki heh pulit, ha kaba ka la bthah ïa ki ban pynkloi ban kem ïa baroh kiba shah kynnoh.
Ka la ïathuh shuh shuh ba la ithuh ïa baroh 5 ngut kiba la donkti bad arngut la dep ban kem na Bihar.
“Nga ngeit skhem ba baroh 5 ngut ki suba donkti yn sa kem noh kloi. Ngi dang ïai bteng ban ïatreilang bad ka bor synshar ban pynthikna ba kum kine ki jingjia kin ym jia shuh”, ka la bynrap.
Ka jingtohkit kaba kham bniah halor katei ka jingshah lute ka dang ïaid shakhmat.
