Ahmedabad, ïaïong:
Ka kynhun ATS ha Gujarat ka la pyntroiñ halor ka jingpynshisha ba ka la don ka jingthmu ban thombor da ki lehnoh da kaba kem ïa arngut ki samla kiba la shah kynnoh ba ki la thmu ban thombor pyrshah ïa ka ri, ki la pynsaphriang ïa ki jingmut kiba sniew da kaba Online bad ki la pyrshang ban thaw ïa ka kynhun Ghazwa-e-Hind ha kylleng ka ri India.
Ki nongtohkit ki ong ba la lap ïa ki jingthmu ban shna bom, ki jingïakren jong ki nongleh pyrshah bad ki jingthoh kiba lah ban shah kyntait. Kane ka jingkem, la ong ki heh sorkar, ki la long hadien ka jingkhynra kaba rieh kaba bud sa ki jingtip jong ki nongsyntiat na Siddhpur.
Katkum ka jingpynbna paidbah jong ka kynhun ATS, u PSI A.P. Parmar u la ïoh jingtip kyrpang ba u Irfan Pathan, uba 22 snem ka rta, uba dei u nongshong shnong jong ka Siddhpur, u la shah kynnoh ba u la pdiang ïa ki jingmut ba shyrkhei bad u la ïasnohkti lang bad ki paralok ban pynlong ïa ki kam pyrshah ri ha India.
Ki jingai jingmut ki la pynpaw shuh shuh ba u Irfan u pyrshang ban lum pisa bad ban lum ïa ki marpoh khyndew na ka bynta ki kam shna bom. Da kaba pynsted halor ka jingpyntreikam, ka kynhun ATS ka la thaw ïa ka kynhun pahara kaba kyrpang bad ka la buddien ïa u Irfan shwa ban kem ïa u ha Siddhpur.
Ha ka jingtohkit bad khmih bniah ïa ka mobile phone jong u, la ïathuh ba ka kynhun ATS ka la lap ïa u Irfan ba u ïakynduh lyngba ka WhatsApp bad Instagram bad ki briew kiba la kynnoh ba ki don ka jingïadei bad ka ISIS bad katto katne ngut ki briew kiba don ïa ka jingmut jingpyrkhat kaba radbah.
Ki heh sorkar ki la ong ba ki chat ki kdew sha ka jingthmu ban shim ïa ki samla kiba don kajuh ka jingmut jingpyrkhat na ki jylla bapher bapher bad ban thaw ïa ka kynhun lehnoh ba rieh.
Ka jingpynbna ha ki lad pathai khubor jong ka kynhun ATS ka la ong, “Uba shah kynnoh u la pyrshang ban pynïasoh lang ïa ki kynhun lehnoh na ki jylla bapher bapher, ban pynshlur ïa ki, bad ban pynkhreh ïa ki na ka bynta ki kam pyrshah ri.”
Ki nongtohkit ki la kynnoh shuh shuh ba katei ka jingthmu ka kynthup ïa ki jingthmu ban thmu ïa ki nongïalam saiñ pyrthei, ki briew kiba don jingïadei bad ka RSS bad ban pynjari ïa ka jingsynshar Sharia lyngba ka jingleh donbor.
La kynnoh ruh ba kine ki runar ki dang ïakren ban ai jinghikai ïa ki nongtrei ban shna ïa ki bom RDX bad kiwei kiwei ki tiar pynbthei, ban phah ïa ki sha ki jaka sah, ban ïakynduh ïa ki seng lehnoh nabar ri bad ban pynbeit ïa ki lad pynpoi tiar beaiñ kiba ïadei bad ka Pakistan bad Afghanistan.
Katba ka jingtohkit ka nang jylliew, ka kynhun ATS ka la ithuh sa uwei pat uba la kynnoh ba u dei u paralok jong u, u Murshid Sheikh uba 21 snem ka rta na Mumbai. La pynlong ïa ka jingkhynra kaba ar, hadien kane la kem ïa u Murshid ha Mumbai bad la rah ïa u hapoh phatok.
Ki heh sorkar ki la ong ba la lap ïa ki kot kiba ïadei bad ki kam lehnoh na ki tiar mobile, ryngkat bad ki chat kiba batai bniah ïa ki jingthmu ba la kynnoh ban pyntreikam ïa ki kam pyrshah ri.
Ki sakhi Digital mynta ki don hapoh ka jingpeit bniah jong ki bor aiñ ban wad ïa ki jingïadei kiba kham jylliew bad ban ithuh shuh shuh ïa ki nongshah suba.
Ka Gujarat ATS ka la mudui mukotduma pyrshah ïa baroh arngut kiba shah kynnoh hapoh ki kyndon ba ïadei jong ka Bharatiya Nyaya Sanhita.
Hadien ba la ïalam hakhmat ka ïingbishar, baroh arngut ki la shah rai ha ka kynhun ATS ba ki dei ban shong patok da 11 sngi na ka bynta ban tohkit bniah.
Ki ophisar jong ka kynhun ATS ki la ong ba ka jingtohkit mynta ka long ban lap ïa ki lad ai pisa, ki module hapdeng ki jylla bad kino kino ki nongpynïaid nabar ri kiba don sha lyndet jong katei ka jingthmu ba la kynnoh.
