Chennai, ïaïong:
U Myntri Rangbah jong ka jylla Tamil Nadu u M.K.Stalin, ha ka sngi Ba-ar, u la kyrpad khatduh ïa ki nongthep vote, katba ka jingïalap kaba khlaiñ bha na ka bynta ka elekshon sha ka Ïingdorbar Thawaiñ jong ka Tamil Nadu, ka dang kut noh hynnin ka janmiet, da kaba kyntu ïa ki briew, ba kin kyrshan ïa ka kynhun synrop, ba la ïalam da ka seng DMK, ban pynskhem ïa ka lawei jong ka jylla.
Da ka jingthep vote kaba la buh ha ka 23 tarik u Ïaïong, ka Election Commission ka la pynjari ruh ïa ka jingkhang ban pynmih ïa ki jingai jingmut ha kane ka por ba sngap jar.
Baroh ki don 4,023 ngut ki kyrtong kiba ïakhun ha kylleng ki 234 tylli ki konstitwensi, kaba pynlong ïa ka lynti ban ïakhun tyngeh bha ha ki saw tylli ki kynhun, kaba kynthup ïa ka DMK, AIADMK, Naam Tamilar Katchi, bad kiwei kiwei ki seng.
Wat hapdeng ka jingshit kaba jur bha ha kane ka aïom ha kylleng ka jylla, ki kam saiñ hima sima ki dang ïai bteng, ha kaba ki nongïalam bad ki kyrtong ki ïashim bynta ha ki jingïalang, ki jingïaid lynti, bad ki jingïalap na kawei ka thliew ïing sha kawei pat ban poi sha ki nongthep vote.
U Stalin u la ïalam ïa ka jingïalap elekshon jong ka DMK da ka jingleit jngoh ïa ka jylla baroh kawei, da kaba ïalap ban kyrshan ïa ki nongmihkhmat jong ka seng bad ki seng ba la ïatreilang.
Katba ka jingïalap elekshon ka la jan kut, u la pynmih ïa ka khubor lyngba ki durkhih ha ka rynsan Social Media X, ha kaba u la pynpaw ïa ki jingjop jong ka sorkar jong u bad maham pyrshah ïa ki bor kiba u la ong ba ki thmu ban pynthut ïa ka jingkiew jong ka Tamil Nadu.
Ha kane ka durkhih, u Stalin u la pynpaw ïa ka jingsngew, da kaba ong ba ka jingïadei jong u bad ka Tamil Nadu bad ki briew jong ka, ka don tynrai ha ka jingkitkhlieh kaba jylliew. “Haba ki briew ki khot ïa nga uba kham ma ban ïa u kpa jong nga, nga ïohi ïa ka kum ka jingpynkynmaw ba nga long ka jingma ïa kito kiba kwah ban shet kylla ïa ka Tamil Nadu ne ban khanglad ïa ka jingkiew jong ka”, u la ong.
Haba kyntait ïa ki jingkynnoh ba ka DMK ka long kaba pyrshah ïa ki Hindu, u Stalin u la kynnoh ïa ka BJP ba ka pynphriang ïa ki khana lamler na ka bynta ka jingmyntoi ha ka saiñ pyrthei.U la pynskhem ba ka DMK ka la ïeng beit bad ki jaitbynriew rit paid bad kan dang ïai bteng ban leh kumta.
Haba pynpaw ïa ka jingtreikam jong ka sorkar jong u, u Stalin u la ong ba la ïoh biang ïa ki jaka jong ki temple kiba shongdor palat T.7,000 klur bad ba la pynthymmai da ki hajar tylli ki temple hapoh ka jingsynshar jong ka DMK.
U la bynrap ba ka ‘Dravidian model’ jong ka jingsynshar ka la wanrah ïa ki jingmyntoi kiba khraw ha ka liang ka jingbha jingmiat bad ki jingmih ha ka roi ka par.
Haba jubab ïa ki jingshah kynthoh, u Myntri Rangbah u la kam ba ym don kano kano ka jingsynshar kaba khlem jingduna hynrei u la pynskhem ba ka Tamil Nadu ka bai kali ka kham bha ban ïa kiba bun kiwei pat ki jylla.
U la pynthikna ba la shim ïa ki sienjam ban weng ïa ki jingduna bad ba shen yn sa paw ïa ki jingpynbha.
Da kaba khot ïa ka elekshon kum kaba kongsan, u Stalin u la kyntu ïa ki nongthep vote ban kyrshan ïa ka jingïatylli jong ka DMK ban ïada ïa ka hok, ka kolshor, bad ka lynti ïaid jong ka roi ka par jong ka jylla ha kine ki san snem ban wan.
