Chennai, ïaïong:
Ka Myntri Rangbah jong ka West Bengal ka Mamata Banerjee, ka la ther tyngeh ïa ka Election Commission of India (ECI), da kaba kynnoh ba katei ka komishon, ka la kyntait ïa ka jingïoh jingbit jong ka, na ka bynta ban pynlong ïa ka jingïalang paidbah, ha ka thaiñ Collin Lane, katba ka buh hakhmat eh, ïa ka jingïalang jong u Narendra Modi, Myntri Rangbahduh, hapoh 6 kynta.
Haba kren ha ka jingïalang paidbah ha Jorasanko Assembly Konstitwensi, ka Banerjee ka la ong, “Nga la don ka jingïalang kaba la buh por ha ka thaiñ Collin Lane. Lada ka seng saiñ pyrthei ka la pynlong ïa ka jingïalang hangta, bad ngam shym la ïoh jingbit. Ngam shym la ïoh jingbit ha ka jingpyrkhat kaba ar. Hynrei, la kren shai ïa nga da ka (Election Commission), ‘Ngim lah ban ai jingbit ïaphi.’ Phi la kyntait ban ai jingbit ïa nga na ka bynta ka jingïalang jong nga, phewse ka la dei kaba la pynap lypa da ka jingïalang jong u Myntri Rangbahduh hapoh hynriew kynta.”
Ha ka lah sngi U Blei, ka Banerjee ka la kynnoh ba ka Bhartiya Janata Party (BJP) ka la thmu ban leit shaw ïa ki ophisar jong ka ha kad liengsuiñ tang kumno ban pynthut bad ban pynslem ïa ka liengsuiñ jong ka.
Ka Myntri Rangbah ka la ong ba ïa ka liengsuiñ jong ka la buh ban ap ha ka lynti ïaid liengsuiñ haduh 30 minit, da kaba pynpaw ba kajuh ka jingjia ka la jia bad ka chopper jong u Hemant Soren ruh kumjuh.
Shuh shuh, ka la ong ba ka AITC ka la ïaleh ban ïoh jingbit na ka bynta katei ka jingïalang, da kaba kynnoh shuh shuh ba uwei u nongïalam ka BJP uba la ai kam thep vote u la wanrah jingeh ïa ki paidbah ka district.
“Ngi la hap ban ïaleh shitom ban ïoh jingbit na ka bynta kane ka jingïalang. Ki don ki ophisar kiba la shim kabu. Ki la thmu ban khanglad ïa nga khnang ba ki prokram jong nga kin slem. Kim ai jingbit ïa ngi ban pynlong ïa ki jingïalang. Uwei u briew u la wan uba pyrkhat ba u dei u ‘nongïalam ba heh’ jong ka BJP. Nga tip bha ïa uta u briew uba pynshitom beiñ bad buh jingeh ïa ki briew jong kane ka distrik.Ngin sa siew kylliang ha ka rukom synshar paidbah,” ka la ong.
Ka jingthep vote na ka bynta ka ïingdorbar kaba 294 ngut ha West Bengal kan long ha ki ar bynta. Ka jingñiew ïa ki vote la buh ban long ha ka 4 tarik u Jymmang. Katkum ka Election Commission of India (ECI), ka bynta kaba nyngkong ka kynthup ïa 152 tylli ki Assembly konstitwensi, katba ka bynta kaba ar pat ka kynthup ïa 142 tylli ki seat.
