Bhopal, ïaïong:
Ka jingbeh jong ka lyer kaba jur jong ka saiñpyrthei ka la khie ha kylleng ka jylla Madhya Pradesh bad Rajasthan hadien ba la mih ka jingïakynad halor ka jingkynnoh ba don ka “shithi thok” kaba don jingïadei bad ka Myntri Rangbah barim ka Rajasthan ka Vasundhara Raje Scindia.
Ka shithi, kaba la kynthoh ïa ka jinglong jong ka BJP ha ki mat kum ka aiñ ban buh kyrpang ïa ki kynthei, ka la nang kiew sha ka jingleh jong ki pulit, ki jingshah set phatok, bad ka thma ktien kaba jur hapdeng ka BJP bad ka Congress.
Katei ka jingjia ka la mih haba ki pulit ka Rajasthan ki la poi ha Bhopal bad kem ïa lai ngut ki nongbud bad ki nongtrei jong ka Congress IT Cell halor ka jingsaphriang jong katei ka shithi ba la ïaleh pyrshah ha ki Social Media. Kane ka jingleh ka la pynmih ïa ka jingbitar kaba jur hapoh ka seng Congress, kaba la khot ïa kane ka jingleh kum ka “bym long katkum ka synshar paidbah” bad ka la kynnoh ba ki bor synshar ki pyndonkam da ki mashin ki pulit ban pynsngap jar ïa ki nongpyrshah.
La rah sha patok ïa ki nongtrei kiba la shah kem ha kaba ïadei bad katei ka jingthoh kaba la saphriang bha, kaba la pynlong ïa ki heh nongïalam jong ka seng Congress, ba kin leit mareh sha thanad jong ka MP Nagar ha Bhopal, kum ka jingpyrshah.
Ki nongïalam jong ka seng ki la buh jingkylli ïa ka jinglong aiñ ban thmu ïa ki briew ba la jied na ka bynta ki jingthoh kiba la dep pynphriang kylleng ki rynsan, da kaba kynthoh ba katei ka jingleh ka pynkheiñ ïa ka rukom treikam kaba dei bad ka jinglaitluid ban pynpaw pyrthei.
Haba kynthoh tyngeh, u MP ka Rajya Sabbha u Vivek Tankha u la kynnoh ba ki pulit Cyber jong ka Madhya Pradesh ki la set ïa kitei ki lai ngut ki nongtrei ka Congress haduh palat 27 kynta khlem ki nongrim kiba biang.
Da kaba khot ïa ka jinglong jingman kaba buh ha ka “jingkyndit”, u Tankha u la ong ba ka jingpynmih kyrpang ïa ki katto katne ngut ki briew na ka bynta ka post kaba la ïohi bad ïasam da ki million kam long kaba hok bad kam long kaba lah ban pynneh pynsah katkum ka aiñ.
U la maham ba ka seng kan pynkynriah sha ka ïingbishar jong ka Madhya Pradesh High Court lada ym pyllait ïa ki nongtrei.
U Harish Chaudhary State In-charge jong ka Congress ruh u la ther tyngeh ïa kane ka jingleh, da kaba ong ba ka dei ka jingthombor beit beit ïa ki nongrim jong ka synshar paidbah.
“Ka jingbat ïa ki nongtrei jong ka seng ha phatok palat 24 kynta na ka bynta ki kam Social Media ka long kaba lah ban pynrem bad ka pyni ïa ka jingpyndonkam bakla ïa ka bor,” u la ong da kaba dawa ban pyllait noh mardor bad ka jingtohkit kaba hok.
U President jong ka State Congress, u Jeetu Patwari, u la pynjur shuh shuh ïa katei ka jingshah thombor, da kaba kam ba katei ka jingïakajia, ka la pynpaw ïa ki jingpyrshah saiñ pyrthei, kiba kham jylliew.
U la buh jingkylli balei ba la shah thombor tang ki nongtrei ka Congress haba la pynphriang paidbah ïa kajuh ka jingthoh. “Lada ka shithi ka dei kaba thok, leh pyrshah ïa baroh. Lada ka dei kaba shisha, sangeh noh ban pynrem ïa ka jingshisha,” u la ong.
Hynrei ka BJP ka pynskhem ba ka mat kam dei shaphang ka jingpyrshah hynrei shaphang ka jingpynphriang ïa ki tiar thok, da kaba buh ïa ka kum ka mat jong ka jingkitkhlieh ha ka liang ka aiñ ban ïa ka jingthmu saiñ hima sima.
Kiba kum kine ki jait kam khlem pep kin kloi ban wanrah ki jingïapher jingmut bad ki jingïakynad hapdeng ki seng saiñ pyrthei bad kumjuh ka jingbym ïoh jingshaniah jong ki seng saiñ pyrthei, bad kane kan pynjur ïa ki thma pohïing bad kumjuh ki jingïakawang ktieh kiba mar kylliang hapdeng kiba bun ki seng saiñ hima sima kiba don ha kylleng ka ri.
Hapdeng ka jingïakynad kaba nang jur, ka Vasundhara Raje ka la pynmih ïa ka jingkren kaba khlaiñ, da kaba pynskhem, “Ka jingshisha kam donkam ïa ka jingïada na ka ding,” bad ka la kyntait ïa ka shithi kaba la pawnam kum ka jingleh jingkamda ki kti jong ki “nongkyrkhu.”
Ka la pynpaw biang ïa ka jingkyrshan jong ka ïa ka jingthmu jong ka Women’s Reservation ba la ïalam da u Myntri Rangbahduh ka ri u Narendra Modi bad ka la kynnoh ïa ki nongpyrshah ba ki pyrshang ban wanrah ïa ka jingkulmar.
