New Delhi, ïaïong:
Ha ka lyngkhuh ba shisnem jong ka jingjia ba shah thombor ki riewpaidbah ha Pahalgam, u Myntri Rangbahduh ka ri u Narendra Modi ha ka sngi Balang u la pynskhem ba ka India kan ym pyndem satia ha kano kano ka rukom thombor bad ki jingthmu ba shyrkhei jong ki lehnoh kin ym urlong satia.
Ka kynhun lehnoh Lashkar-e-Taiba kaba don ha Pakistan, ka la pynlong ïa ka jinghiar thma ha Pahalgam ha Jammu & Kashmir ha kum kane ka sngi jong u snem ba la lah, ha kaba la pynïap ïa 26 ngut ki briew kiba lui-lui bad kiba bun ki dei ki nongjngohkai pyrthei na kylleng ka ri India.
“Ka jingkynmaw tympang ïa ki mynsiem ba lui-lui kiba la duh ha ka jingshah thombor kaba shyrkhei ha Pahalgam ha kane ka sngi jong u snem ba la lah. Yn ym klet ïa ki da lei lei ruh,” la ong u Modi ha ka jingthoh ha ka rynsan ‘X’.
U Myntri Rangbah u la ong ba ki jingpyrkhat jong u ki don ruh bad ki longïing kiba la duh noh namar ki ïakhun pyrshah ïa kane ka jingduh. “Kum ka ri, ngi ïeng kawei ha ka jingsngewsih bad ka jingkut jingmut. Ka India kan ym pyndem satia ha kano kano ka rukom thombor. Ki jingthmu ba shyrkhei jong ki lehnoh kin ym jop satia,” u la ong.
Hadien ka jingthombor jong ki lehnoh ha Pahalgam, ka India ka la pynlong ïa ka jinghiar thma jong ki shipai ban siew kylliang pyrshah ïa ka Pakistan kaba la ai kyrteng ka Operation Sindoor, ha kaba ki shipai jong ka India ki la pynjot ïa ki jingtei ki shipai bad ki jingtei ban leh ïa ki kam pyntriem ha Pakistan bad ha Pakistan Occupied Kashmir.
