Kolkata, ïaïong:
Ka seng Congress ka la pynshisha ba ka seng Trinamool kaba bat ïa ka jingsynshar ha Bengal ka la kyntait ban ai jingbit na ka bynta ka jingïalang paidbah jong u Rahul Gandhi ha Kolkata hashwa ban thep vote ha ka sngi Palei na ka bynta ka bynta ba nyngkong jong ka elekshon sha ka ïingdorbar thawaiñ jong ka Bengal.
Une u MP jong ka Lok Sabha, u dei ban poi ha katei ka nongbah ban ïalam ïa ka jingïalap jong katei ka seng.
Ka Congress ka la kam ba ka la ap haduh ka por 6 baje janmiet jong ka sngi Ba-ar ban ïoh jingbit na ki bor synshar ka thaiñ. Hynrei namar ba ym shym la ai jingbit, la shim ba ym lah shuh ban pyndep ïa ki jingpynkhreh na ka bynta ka jingïalang jong ka 23 tarik u Ïaïong.
“Yn sa aiti ïa ka jingkyrpad bathymmai na ka bynta ka jingïoh jingbit jong ka bor synshar na ka bynta ka por ba la pynkylla, kaba lah ban long ha ka 25 ne 26 tarik u Ïaïong, ” la ïathuh ki tyllong khubor jong ka seng ha ka lad pathai khubor.
Ka seng ka la kynnoh ba ka bor synshar shnong bad ki pulit ki la leh katkum “ka jingbthah jong ka sorkar ba ïalam da ka Mamata Banerjee”, bad ki la kyntait ïa ki jingai jingbit kiba donkam na ka bynta katei ka jingleit jngoh.
U Subhankar Sarkar, uba dei u heh jong ka seng Congress ha ka jylla, u la kynnoh ba ka Trinamool bad ka BJP, kaba dei ka seng ba kongsan jong ka liangpyrshah, ki shah pyntieng pynsmiej, na ki jingïalang paidbah da u Rahul Gandhi, ba la pynlong ha Malda bad ha Murshidabad.
Ka Shashi Panja, kaba long ka Myntri jong ka Women and Child Development ha Bengal ka la jubab na ka bynta ka jylla , da kaba kdew ba ïa ki aplikeshon na ka bynta ki jingïalang paidbah hap ban leh lyngba ka website jong ka sorkar, ka Suvidha Portal bad shwa bha.
“La ai jingbit lyngba hangta. Donkam ban leh ar ne hynñiew sngi shwa… kane ka kyndon ka treikam ha baroh ki jingïalang paidbah bad baroh ki seng saiñ pyrthei.”
Halor ka jingbym ai jingbit da ki bor synshar, ka la shim ïa ka jingkynthoh ha ka Election Commission (EC), ha kaba ka Trinamool ka la don ka jingïakhun kaba ïaid beit ha ka jingpynkhreh ïa kane ka elekshon, kaba dang shen eh halor ka jingpynkynriah kam ïa ki pulit bad ki heh ophisar.
“Ka sorkar ba peit ïa ka Jylla kam lah ban jubab na ka bynta ban pynsangeh ïa ka jingleit jngoh jong u… Ka EC ka lah ban jubab ïa kata,” ka la ong.
U Gandhi u la dei ban leit sha ka konstitwensi jong u Sarkar ban ïalap elekshon.
Ha ka 14 tarik u Ïaïong, u Gandhi u la kren ha ki lai tylli ki jingïalang ha North Dinajpur, Malda, bad Murshidabad distrik. U lah ban leit sha Bengal shisngi ban ïalap elekshon ha ki jaka thep vote ha ka bynta kaba ar, kata ha ka 29 tarik u Ïaïong.
Kane ka jingpynsangeh ka long hapdeng ka jingïakhun kaba jur bha na ka bynta ka Bengal, ha kaba ka Congress ka ïakhun ha ka jingïatreilang bad ka Left Front, ha kaba bunsien ka shem ïalade ba ka don ka jingïapher jingmut bad ka Trinamool kaba bat ïa ka jingsynshar.
Ka jylla, kan sakhi ïa ka jingïakhun kaba jur bha hapdeng ka Trinamool, kaba wad ïa ka samoi treikam kaba saw sien lynter bad ka BJP, kaba thmu ban thaw ïa ka sorkar, hadien ba ka la pyni bor bha ha ki elekshon ba la dep.
Ha ka elekshon 2021, ka Congress kam shym la lah ban plie ïa ka account jong ka. Hadien kata ka jingïakhun kaba shyrkhei, ka thmu ban pynkylla ïa ka jingïakhun ka Trinamool pyrshah ïa ka BJP sha ka jingïakhun kaba lai bynta.
Ka jingthep vote na ka bynta ka ïing dorbar kaba don 294 ngut ki dkhot kan long ha ki ar bynta bad ka jingñiew ïa ki vote la buh ban long ha ka 4 tarik u Jymmang.
