Mumbai, ïaïong:
Ka seng Congress bad ka seng NCP (SP) kiba dei ki seng ba la ïatreilang ha ka kynhun ka liang pyrshah ka Maha Vikas Aghadi (MVA) ki kwah ba u President ka Shiv Sena (UBT) u Uddhav Thackeray un long u kyrtong synrop lang na ka bynta ka elekshon sha ka Legislative Council jong ka Maharashtra, kaba la buh ban long ha ka 12 tarik Jymmang.
Yn pynlong ïa ka elekshon shiteng samoi na ka bynta ki 10 tylli ki MLC seat. Katkum ka jingkhlaiñ jong ki seng ha ka ïingdorbar, ka MahaYuti kaba don ha ka liang synshar ka lah ban jop khyndai tylli ki seat bad ka MVA kawei. Ha ka MahaYuti, ka BJP kan ïakhun na ka bynta 6 tylli ki MLC seat katkum ki jingdon jong ki assembly, ka Shiv Sena kan ïoh ar tylli bad ka NCP kawei.
U President ka Maharashtra Congress u Harshvardhan Sapkal u la ïakynduh ïa u Uddhav Thackeray ha Matoshree ha ka sngi Palei ban pynïeng ïa u president ka Sena (UBT) kum u kyrtong marwei jong ka MVA na ka bynta kawei ka shuki MLC.
“U Uddhav u dei u khmat jong ka MVA ha Maharashtra.Ngi sngew ba u dei ban pdiang ïa ka jingthep kyrteng lang jong ka MVA na ka bynta ka elekshon kaba ar snem ha ka 12 tarik u Jymmang”, la ong u Sapkal.
Ka MP jong ka NCP (SP) Lok Sabha ka Supria Sule ka la ong ba ki ïamynjur lang ba u Myntri Rangbah barim ka jylla u Thackeray u dei ban ïoh ïa ka kyrteng kum u kyrtong monlang ka MVA ha ka elekshon MLC.
“U Uddhav Thackeray u dei u nongmihkhmat uba la tbit bha bad ka MVA ka ïoh ïa ka jingmyntoi na ka jingshemphang jong u hapoh ka ïingdorbar. Ka jingdon jong u ha ka dorbar jylla ka long kaba kongsan.
Ngi kyrshan ïa ka ïakhun jong u Uddhav ha ka elekshon MLC. Ngi don ka jingkyrmen ba un jubab bha ïa ka jingdawa jong ngi bad un mihkhmat ïa ka seng jong u bad ka MVA ha ka dorbar jylla”, la ong u Sule. Hynrei u Uddhav um pat pynshai ïa ka nongrim jong u.
Ki la don kumba khyndai tylli ki seat ki la sah thylli ha ka ïingdorbar ba halor hadien ba la kut ka por treikam jong ki MLC. Ka jaka shong jong u Uddhav ka long kawei na ki.
Kawei pat ka shuki ka la hap thylli hadien ba ka MLC ka Pranya Satava ka la iehnohkam na ka seng Congress bad leit pynïasoh noh sha ka seng BJP. Yn pynlong ïa ka elekshon shiteng samoi na ka bynta kane ka shuki.
Katkum ka jingkhlaiñ jong ka ïingdorbar kaba mynta, u kyrtong u donkam ym duna ïa ka 29 vote ban jop. Na ka bynta ka elekshon shiteng samoi, u kyrtong u dei ban ïoh ym duna ïa ka 51% na ka jingthep vote baroh. Ki MLA ki dei ki nongthep vote na ka bynta ka elekshon MLC.
U ïalam ka seng thaw aiñ ka Maharashtra Congress u Vijay Wadettiwar u la ong ba kin pdiang sngewbha ïa ka rai ban pynlong ïa u Uddhav kum u kyrtong monlang jong ka MVA na ka bynta ka MLC seat jong katei ka kynhun synrop.
“Lada u Uddhav Thackeray u don ka jingthmu kaba kham pher ha ka jingmut jingpyrkhat jong u, te ïa ki jingthep kyrteng na ka bynta ka shuki MLC jong ka MVA hap ban ïakren bad ki seng ba ïatrei lang, ym ha ki lad pathai khubor,” ong u Wadettiwar.
“Ha ka elekshon Rajya Sabbha, ngi la kyrshan ïa u Sharad Pawar na ka bynta ka jingïatylli jong ka MVA. Ha ka elekshon sha Legislative Council, ngi ïa mynjur lang ban kyrshan ïa u Uddhav Thackeray”, u la ong.
U President ka Congress ha Maharashtra, u Harshvardhan Sapkal, u la ïakynduh ïa u President ka Sena (UBT) u Uddhav Thackeray ha Matoshree ha ka sngi Palei.
“U Uddhav u dei u khmat jong ka MVA ha Maharashtra. Ngi sngew ba u dei ban pdiang ïa ka jingpynrung kyrteng lang jong ka MVA na ka bynta ka elekshon kaba ar snem ha ka 12 tarik Jymmang sha ka Legislative Council”, la ong u Sapkal.
