Lucknow, ïaïong:
Ka Uttar Pradesh Anti-Terrorism Squad (ATS), ha ka sngi Palei, ka la kem ïa arngut ki briew kiba don ka jingïadei bad ki ISI, kiba thmu ban pynbthei bom ha ki bun tylli ki nongbah jong ka jylla bad ha Delhi. Kine kiba shah kynnoh, kiba la don ha ka rta kaba 20 snem eiei, ki dei kiba la tip kyrteng kum u Tushar Chauhan ïa uba la tip ruh da ka kyrteng kum u Hizbullah Ali Khan, uba na Baghpat uba sah mynta ha Meerut bad u Sameer Khan uba na Delhi.
Ki heh jong ka kynhun ATS ki la ong ba na ki jingtohkit ïa u Tushar ki la pynpaw ïa ka jingthmu ban leh ïa ki kam lehnoh. “Ki jingshah kem ki la pynpaw pyrthei ïa ka rukom thung kam kaba pynkhihwin lyngba ki Social Media ha kaba ïa ki samla la pynlong riewkhlaw bad pynshlur ban leh ïa ki kam thombor,” ong uwei u heh jong ka kynhun ATS.
U Tushar u la phla ba la aiti ïa u ïa ka kam ban pynbthei bom ha Delhi bad UP ban pynduh jait ïa ki briew kiba la ithuh da ki nongpynïaid jong u ha Pakistan, ong u heh ka kynhun tohkit. “Kum ka jingsiew kylliang, la kular ïa u da T.3 lak bad ka jingkyrshan ha kiwei pat ki kam, nalor kane la pynkynriah jaka ïa u sha Pakistan lyngba ka Dubai”, la ong u heh ka kynhun.
Ki tyllong khubor na ka kynhun ATS, ki ïathuh ba u Tushar, u la shah pynkylla uba kyrpang, hadien ba u la ïakynduh ïa ki runar kiba sah ha Pakistan, u Shahzad Bhatti bad u Abid Jat, lyngba ka Instagram. Ka jingïakren hadien ka la kylla sha ki lad ba la buhrieh, kynthup ïa ki jingïakren lyngba ka durkhih.
