Raphael Warjri
Na kata ka daw ha ba pule ïa ki puriskam ki khanatang jngan ban kam ba ki dei kiba shisha namar ba ngi khlem im ha kata ka juk. Hynrei ban ong pat ba ym dei kiba shisha ruh ym lah namar ba ki khana ki parom pateng-la-pateng ki tuid na ki longshwa manshwa khlem dkut, lait noh tang ha ka khep ba wan thombor ki phareng ki ba kynnoh ïa ki Khasi ba ki mane ksuid, bad nalor kata ki wanlam bujli da ka niam Khristan ka ba la bthat jubor ïa ka jingtip ïa la ka tynrai. Dei hangta ba u saibteng u la phot noh namar palat shiteng shiliang na ki bynriew ki la pdiang ïa ka niam Khristan bad kyntait ïa la ka tynrai bynriew lajong. Ynda la tyndep sa da ka tynneng, la nang per shuh shuh ka jingim ba pura kum ka jaitbynriew. Ynda la thame shilynter ym don lad shuh ban tip la ka tynrai haba ka kam ba kongsan ka long ban shakri ïa ka balang shiphew shah ban ïa ka ba tipthuh ïa la ka tynrai longbriew manbriew. Lada ka jingim jong u Jisu ka shon jingmut ha ki parabangeit Khristan haduh katta katta ban im riewblei, sngewrit, ïaishah bad ieit markylliang ïa la ki para bynriew bad kumta ter ter, kan jyn da la bha palat. Hynrei ki riewngeit Khristan ki pynksan ïa la ka kynhun ban kiar bad kyndiah na kawei pat ka balang Khristan ka ba dei da kawei pat ka kynhun. Ym lah ban tip kano kaba shisha na ki phew hajar tylli ki balang Khristan kiba la krih bad jyllei ha kane ka pyrthei, namar manla ka kynhun ki kam bad pyrkhing triang ban pynksan ïa ka lajong bad kyntait ïa kiwei.
Jar la katta ki dang don ki riewngeit Khristan ki ba kam ba ki tipthuh ban ri kyndong ïa la ka riti dustur tynrai, wat ha ba ki la kylla sha ka niam Khristan. Ka jingshisha pat ka long ba ka synjor kata ka tip riti haba la lap miet lapshai shisngi shi ïa manla ka taiew ban ngam pura ha ka kam balang, bad kaba tip riti ka dei tang ban ioh ïa ka hok na ka iktiar sorkar bad ban myntoi shimet. Na kata ka daw ka ba ngam jylliew ha la ka tynrai ka long kaba donkam khnang ban kham tip shuh shuh bad sngewthuh kham shai ïa la ka nongrim kum ki paidbynriew ha kane ka meiramew. Hynrei kiba bun ba lang ki shah pynkylla lieng ka pyrkhat da kaba kam ba ki beh ïa ka jingshai kaba thaba khlek ber na sha jngai bad khlem iohi shuh ïa kaba tyngshaiñ phyrnai na la rympei lajong. Kumba ong u Myllung Soso Tham ‘Jingshai ngi wad sawdong pyrthei, jingshai ka Ri ngim tip ei ei’. Ha ba kdew ïa kata kaba dkut saibteng la ki jingtip ïa ka tynrai lah ban nam na kine ki kyntien shong sbai jong u Myllung Soso Tham uba ha ka juk jong u la sngewthuh ba u tmang bad bynñiaw haba khmih ïa ki paidbynriew lajong ba ki la shah tyllep ha kaba shakri ïa ka balang bad lyndet noh ïa la ka tynrai. Kane ka jinglong jingman ka dang bteng haduh mynta mynne bad ka la nang rasong man la ka por.
Hapdeng kita kiei kiei baroh, dang don hi khyndiat khynsoit ki briew kiba shim khia ïa kata ka bynta da kaba trei jar jar ha lade bad suki suki pyrshang ban pyni da ki nuksa hakhmat ka imlang sahlang na ka bynta ban kylla na ka jingim ba ju mlien bad ban tipthuh ban thwet la ka tynrai. Ka jingtip ïa la ka tynrai lyngba ki khanatang bad puriskam ka long u saijingim jong manla ki paidbynriew kiba im pateng ha kata ka jaka naduh kulong kumah katba lah ban tip pateng-la-pateng na la ki longshwa manshwa. Ki paidbah baroh ki long kumba jngi ha ka ramia jong ka thame ïa kaba la pyntian jubor kiba na shiliang duriaw, ba haduh mynta ruh ym pat kyndit na kata ka syrwet jong ka ramia. Lada khlem wan synshar donbor ka sorkar Bilat, ki paidbah kin ym bna shaphang jong kaei kaei kaba la wanlam na sha Ri nongwei, hynrei kin ïaineh ha ka jingtip ïa la ka thymmei ka ban shong tynrai ha ka pyrkhat bad ha ki kam. Kata hi kan long ka jingstad jong ki longshwa manshwa ka ban kyntiew ïa ka longbriew manbriew ha ka imlang sahlang. Hynrei ym myntoi shuh ban pyrkhat shaphang kata namar la dep shah tyllep bad ki jingkylla ki la jia manla ka por naduh ki spah snem ba lah leit. Hynrei kane ka rukom pyrkhat ka long ban kyrsiew ïa kito ki ba mon ban puson ha la ka thymmei ba katno ka don ka pasoh jong ka jingstad ki longshwa manshwa kaba lah ban kyntiew ïa ka longbriew manbriew ha ka imnlang sahlang. Wat lada ka pateng bynriew ka la shah lynsher ha kata ka pyrkhat mynder, lada mon ban kyndit bynriew ka long kaba dei na ka bynta ka lawei.
Ki paidbynriew Khasi khamtam kito kiba la kylla niam Khristan ki dei ban puson ba kata ka jingngeit Khristan ka la phrung ïa kata ka pyrkhat ba yn aiti ïa ka sngi U Blei sha ka kam balang, yn pynban biang sa shisien sha ka kam balang- bad ym dei sha ka kam riewblei da kaba shitrhem bad shem mynsiem. Kane kam mut tang ïa ki paid riewngeit Khristan hynrei ïa kiwei kiwei ruh kiba ym don kata ka pateng jingngeit lane ki ba syntan ïa ki kam balang, namar ñiar eh ban shem ki ban puson shaphang ka jinglong kordor bad kynsai ka thymmei longbriew manbriew bad ka tynrai jong ka riti dustur kaba la lah ban kyrda ïa ka jaitbynriew haduh mynta kumba ka long.
