Hyderabad, ïaïong:
Ka Telangana High Court ka la bthah ïa ka sorkar jylla ban pynshai la ki nongrep ki ïoh ne em ïa ka sboh Urea kaba biang hapdeng ka jingsngewkhia halor ka jingdon bad ka jingïoh.
Ka kynhun nongbishar jong u Chief Justice u Aparesh Kumar Singh bad u Justice GM Mohiuddin ki la pynmih ïa kane ka jingbthah ha ka por ba bishar ïa ka PIL ba la mudui da ki nongrep na Nalgonda distrik.
U Chief Justice u la kyrpad ïa u nongmudui jong ka sorkar na ka bynta ka rep ka riang ban ai ïa ki jingtip ba bniah hapoh saw taïew halor ka jingdon, ki sienjam ba la shim ban pynbna paidbah ïa ki jaka buh stok bad la ki nongrep ki lah ne em ban ïoh ïa ka app jong ka sorkar ban pynap lypa ïa ka urea.
Ka kynhun nongbishar ka la pynpaw ruh ïa ki jingsngewkhia halor ka jingthut ha ka jingpynbiang marbam ha ka jingïadei bad ka thma kaba dang ïaid shakhmat ha East Asia.
Ka sorkar ka la aiti ba la buh ïa ki jaka pynsuk ha man la ki distrik ban ïarap ïa ki nongrep ban pynap lypa ïa ka urea lyngba ka app, ryngkat bad ka jingïarap ba kham bun kaba lah ban ïoh na kiba ha ïing ha sem.
Ka la ong shuh shuh ba ïa ka urea la pynbiang ha ka dor ba la ai jingïarap kaba long T.266 shi pla pyrshah ïa ka dor ïew kaba long kumba T.3,000, ryngkat bad ka jingpynshisha katkum ka Aadhaar ban pynthikna ïa ka jingpynpoi sha ki nongrep ba shisha.
Ki nongïasaid aiñ na ka bynta ki nongmudui ki la kynthoh ba bun ki nongrep ki ïaleh pyrshah ïa ka rukom online namar ka jingbym don ka lad ban ïoh bad ka jingtip ba ïadei bad ka jingstad, bad ki la wad ïa ka jingsam mar ryngkat lyngba ki nongdie marbam ba la ai bor, ki ophis rep bad ki seng treilang.
Ïa kane ka kam la pynsangeh noh saw taïew ban ïoh ïa ka jubab kaba bniah.
