Kolkata, ïaïong:
Ki pulit jong ka Bengal, ki la kem ïa saw ngut ki nongbylla na ka seng kaba bat ïa ka jingsynshar ka Trinamool Congress, ha ka step jong ka Lah sngi U Blei, hadien ba ki la leit ban khynra ïa ki ïing sah jong ki 15 ngut ki briew, kiba la shah kynnoh ba ki donkti ha ki kam thombor ha Jagaddal ha North 24 Parganas distrik.
Ïa kine ki saw ngut la tip kyrteng kum u Koushik Das, (27), u Sikander Prasad (39) bad u Gopal Routh bad u Shyamdev shaw (55). Kumba la ïathuh ka tyllong khubor, la ong ba uwei napdeng kine kiba la shahkem la lap ba u la rieh hakhrum jingthiah ha ka por ba la thmu ban leit kem ïa u. Kiwei pat kiba la shah kynnoh ki la phet na ki ïingsah jong ki hadien ba ki la tip ïa ka jingleit khynra jong ki pulit.
Kane ka jingkem ïa kine ki briew ka la long, hadien ka jingïakynad hapdeng ki nongkyrshan jong ka Trinamool bad ka seng BJP, ha ka miet jong ka sngi U Blei, katto katne kynta shwa ba u Myntri Rangbahduh ka ri, u Narendra Modi, un pynlong ïa ka jingïalang paidbah kaba heh bha ha Barrackpore kaba marjan, hashwa ka bynta kaba ar bad kaba khatduh jong ka jingthep vote. La pynjur ïa ka jingpahara ha Jagaddal bad ha Barrackpore bad la pyntreikam khambun ïa ki shipai.
La ïathuh ba katei ka jingïakynad ka la jia hadien ba la pynpra bad pynjot ïa ki lama bad ki poster na ka bynta ka jingleit jngoh jong u PM.
Ki nongbud jong ka seng BJP ki la kynnoh ba ki nongbud jong ka seng Trinamool ki la pynjulor ïa ki tiar ïalap elekshon. Ka jinglong jingman ka la nang jur bha bad ki nongkyrshan na baroh arliang ki la ïalum lang hakhmat ka thanat Jagaddal, kaba la pynlong ïa ka jingshah kawang maw bad ka jingïapynibor mar kylliang.
Ki bor pynjari aiñ ha ka thaiñ ha kaba sdang ki la ïaleh ban tehlakam ïa ka jingïakynad.
Ka Election Commission ka la ong ha ka jingpynbna ba ki”paidbah kiba bun kiba don kumba 200 ngut eiei ki la ïalum lang ha thanat” kum u heh pulit ba la shongthait bad u kyrtong jong ka Jagaddal u la pyrshang ban ujor mukotduma ha ki pulit. Ki briew “ki la rung be-aiñ ha ka jaka treikam jong ki pulit bad ki la thaw ïa ki jingkulmar”, la ong ka kynhun ba dei khmih ha ki kam elekshon.
“Ha ka por ba ka jingïakynad ka dang jur bha, ki paidbah ki la thombor ruh ïa ki pulit jong ka kynhun CAPF, kaba la pynmynsaw ïa uwei u pulit CISF, kaba pyni ïa ka jingsniew kaba jur jong ka jinglong jingman bad ka jingpyrshah beit ïa ki bor pynjari aiñ,” ong ka EC.
Bad, ha ka jingjur jong ka jingïakynad, la ïoh khubor ba ka don ka jingbthei bom ha ka ïingsah jong u MLA ka BJP, u Pawan Singh, uba ïakhun na ka shuki jong ka Bhatpara (General) Assembly.
Ka la don ka jingpynbthei bom ha ka ïingsah jong u. ki la don kumba lai ngut ki briew kiba la mynsaw ha ryngkat ka jingshah pynjulor jong ki jingdon jingem.
Ki pulit ki la buh da ka jingmudui mukotduma ha kaba ïadei bad ka jingbthei bom bad ki jingpynkulmar, hynrei ka jinglong jingman ka dang long ka dang shah ktah jur naba kine ki arliang mamla ki dang ïai bteng ban ïakdew kti markylliang ha kaba ïadei bad ki kam saiñ pyrthei.
Ha kajuh ka por, ka kynhun National Investigation Agency ka la buh jingmudui da ka mukotduma ba kyrpang ban tohkit halor ka jinglap ïa ki 79 tylli ki bom bym pat pynkhuid na ka ïing jong uwei pat uba la shah kynnoh uba dei u nongbud jong ka seng Trinamool ha South 24 Parganas.
Shwa ïa kane, ka Election Commission ka la hukum ïa ki pulit jong ka Bengal ba kin pynlong ïa ka jingpyntreikam kaba kyrpang ban kem ïa kiba donkti ban shna bom bym pat pynkhuid ha kane ka jylla, la ong uwei u heh pulit.
Kane ka jingbthah ka la mih hadien ba ki pulit ki la lap ïa ki bom bym pat pynkhuid kiba bun, katto katne sngi shwa ban sdang ïa ka bynta kaba ar bad kaba khatduh jong ka elekshon Assembly ha ka jylla.
Ka Bengal ka thep vote ha ka elekshon sha ka ïingdorbar thawaiñ kaba ar bynta kaba la ïohi paidbah ba ka dei ka jingïakhun kaba jur bha hapdeng ka Trinamool bad ka BJP. Ka bynta kaba nyngkong ka long ha ka 23 tarik, Ïaïong. Ïa ki nongjop yn sa pynbna ha ka 4 tarik, Jymmang.
Ka North 24 Pargana ka la ïohi ïa ki heh nongïalam jong ka seng BJP, kynthup ïa u Myntri Rangbahduh u Narendra Modi, u Amit Shah, uba long u Myntri ka sorkar pdeng uba dei khmih ïa ka tnat ki kam pohïing bad u heh nongïalam jong ka seng u Nitin Nabin, ha ka jingïalap elekshon ban pynskhem ïa ka jingkyrshan ha ka distrik kaba bun paid.
